Lungleiah vawksa man bithliah thar a ni

#ZONEWS Lunglei November 19, 2025: Vawiin khan Lunglei District Level Committee on Fixation of Price of Meat, Vegetables and Fruits chu Lunglei DC Conference Hall-ah Additional Deputy Commissioner Pi Zoramdini kaihhruaiin an ṭhu khawm a. Lunglei District chhunga vawksa zawrhna leh hralhna tur man an bithliah thar.

He ṭhut khawmah hian DC Office, Commerce & Industries, Agriculture, AH & Veterinary, Fisheries, Horticulture, Police, Legal Metrology, Local Council, Lunglei District Consumer Association leh District MJA ai awhte an tel a. AH & Vety Department aṭangin vawk vulh chungchang leh a kaihhnawih thil pawimawh hrang hrang ngaihthlak niin, vawk vulhtu, a sattu (zuartu) leh a leitu (consumer)-te dinhmun leh chanvo te kil hrang hrang aṭanga thlir ho a ni a. District Level Committee chuan Lunglei District chhungah vawksa chu a misa emaw, a ti ṭha lai bik emaw pawh thliar lovin kilogram (kg) 1 ₹450/- ni se, an ti a. Kg khatah hian a misa leh a kawchhung te pawh a tel theih tho avangin leh a hranpaa a sa ṭha pawh thliar lovin a man hi hrut rual mai ni se tia ruahmanna siam niin, rorel hi kum thar lamah a ṭul anga thlir let ni se, tih a ni.

District Level Committee ṭhu khawm chuan buk tling ngeia vawksa hralh a nih theih hma lak ni se tiin, a en zui turin C&I, Legal Metrology, Police leh Local Council te ruat bik an ni a. Sawrkarin dan a neih angin rate bithliah anga sa zuar lo leh buk tling lote chungah hremna leh kawh theih a nih thu te, sawrkar building-a inzuarte chu an seat cancel-sak theih an nih bakah ₹1,000/- chawitir theih an nih thu te tar lan a ni.

District Level Committee chuan thlai leh chawhmeh dang pawh a funa fun lovin, a buk ngeia hralh theih ni se an duh thu sawiin, heti ang tur hian a ṭul anga inzirtir ni se, an ti bawk.