Lungleiah electronic cigarette khapna dan (PECA) chungchang zir hona buatsaih a ni

#ZONEWSLunglei November 18, 2025: Vawiin khan Lunglei SP Conference Hall-ah National Health Mission (NHM) leh National Tobacco Control Programme (NTCP), Lunglei District ṭang kawp huaihawtin electronic cigarette khapna dan, “Prohibition of Electronic Cigarettes Act, 2019” (PECA) zir hona buatsaih a ni.

He hun hi Lunglei District Superintendent of Police Pu J. Lalmuankima’n a kaihruai a. SP office staff-te bakah, Lunglei, Bunghmun, Lungsen leh Tlabung Police Station aṭang tein dan leh thupek keng kawhtu Law Enforcer/Police Officer-te he hunah hian an tel.

NTCP State Nodal Officer Dr Zoramthangi Renthlei chuan vaihlo ṭhat lohzia sawiin, a ṭhat lohzia hre reng chunga Mizorama vaihlo hmang kan la tam hi sim a ngai tak zet a ni, a ti.

NTCP State Legal Consultant Pi Vanlalzari chuan Lunglei Police-te chu PECA chungchang zirtirin, he Act hnuaia Section hrang hrangin mihring hriselna atana ṭha lo a nih avanga E-Cigarette/Vape hman a khap dan te, fak mawi, lak luh, thawn chhuah, siam chhuah leh kawl a khap dan te, E-Cigarette nihphung leh hriselna atana a ṭhat lohzia te chipchiar takin powerpoint presentation hmangin a sawi fiah a. Hemi bakah hian Cigarette and Other Tobacco Product Act, 2003 (COTPA) dan a sawi fiah bawk.

Zawhna leh chhanna leh sawi hona hun hman ni bawkin, NTCP State Consultant Pu R. Lalremruata’n lawm thu sawiin hun a khar.