National Highway 306 & 06 thawmthat that hna kal mek leh tui pipe chungchang Kolasib DC hovin sawiho

#ZONEWS Kolasib November 19,2025: Vawiin khan DC Conference Hall-ah National Highway 306 & 06 siam (repair work) hna thawh mekah kawngpuia inphum tui pipe vanga contractor-ten hna an thawh chak theih loh chungchangah Pu Robert C. Lalhmangaiha, DC hovin meeting neih a ni a. Heng pipe-te hi private tui connection lakna pipe a nih hlawm avangin leh kawngpui siamin a tihchhiat dawn avangin mipuite harsatna a thlen dawn a; engtia hmalak tur nge tih sawiho a ni.

Meeting-ah chuan NHIDCL leh contractor-ten PHE Department-te nen pipe tihchhiat ngai turte a hmunah enhovin, hmalak dan tur sawiho se; private water connection hi a latu mimalten a siam thatna man pawh an chawi tur a nih avangin a veng neitu VC-te leh mimal connection neitute nen sawiho zel ni se tih a ni a. Kawngpui siam that mek chak zawka a kal theih nan hei hi bawhzui nghal ni se tih a ni.

Meeting-ah hian highway ni lo, khawpui  chhung kawngpui (internal road) lai chhiaa tui connection pipe phumna, kawngpui siam that lohva dah rei a nih thin chungchang pawh sawi lan a ni a, meeting-ah hian PWD aiawhte an tel loh avangin chak zawka hma la tura hrilh ni se tih a ni bawk.

Meeting-ah hian Pu Lalrinpuia Varte Sr. SP, Pi B Malsawmtluangi, Addl. DC, Pu Lalmuan Puia DLAO, PHE Dept. aiawh, DUDO, DIPRO, NHIDCL, Jandu Contractor aiawh leh MJA aiawhte an tel a ni.