LAWNGTLAI DEO HOVIN MPF HRUAITUTE LEH ELECTION AGENT – TE THUKHAWM

#ZONEWS Lawngtlai November 20, 2025: Lai Autonomous District Council (LADC) hnuaia 12th Member of District Council (MDC) inthlanpui 2025 – lo awm tur atan a inbuatsaihna kal zelah vawiin khan Pu Donny Lalruatsanga, District Election Officer (DEO) kaihhruaiin DC Conference Hall-ah Mizoram Peoples’ Forum (MPF) Lawngtlai District Forum – hruaitute leh Election Agent- ten thutkhawm an nei.

Pu Donny Lalruatsanga chuan MPF- hruaitute leh Election Agent- te hnena lawmthu sawina a nei hmasa a. Dik tak leh tha taka inthlanna awm turin MPF – te an pawimawh hle tiin, thawhhona tha zawk a awm zel a beisei thu a tarlang a. Inthlannaah MPF – ten theihtawp chhuah an tumna fakawm a tih thu tarlangin, rah tha a chhuah ngei ang a ti . Inthlanna turin inbuatsaihna a kal mek zel a, election official- ten theihtawp an chhuah zel dawn a ni, a ti. A bik takin MCC kenkawh kawngah MPF – te an pawimawh hle tiin, MCC bawhchhiatna a awm em tih te lo bengvarpui turin a sawm a ni.

DEO chuan inthlanna tha taka nei turin Election Agent- te theihtawp lo chhuahpui turin a chah a. Mimal inbeihna, thudik tawk lo vawrh darh, rik rapa chetna leh mipuite tana him lo zawnga che lo turin Party- tin ten mawhphurhna an nei tiin, ralmuang leh zalen taka inthlanna awm tura tan lo la turin a ngen a. DEO chuan mipuiten an duh zawng tak an thlan theihna tura hmalak zel a nih tur thu tarlangin, inthlanna chuhtu zawng zawngte duhsakna a hlan nghal bawk.

Pu H. Zonunmawia, (Nodal Officer, MCC) chuan MPF- te tel lova inthlan a huphurhawm hle tiin, theihtawp chhuahpui turin a sawm a. MCC – tha taka kalpui turin MPF- te an pawimawh hle a, a kengkawhtu tangkai tak ni turin a ngen a. Inthlanna felfai leh thianghlim awm turin compaint- a awm hnu chauha thawkchhuaktu ni lo a, a tir atanga thahnem ngai tak a thawktu ni turin a ngen a ni.

MPF Lawngtlai Forum hruaitute chuan inthlanna fel fai leh thianghlim tak a awm theih nan theihtawp an chhuah tur thu an sawi a. Inthlanna turah thuchah siam a, Kohhran tinah puang tura hmalak a nih tur thu an tarlang a. Party- tin office- a leng a, MPF leh Political Party – ten thawhhona thuthlung an ziah tawh zawm ngei tura ngen an nih tur thu sawiin, vote thlak niah pawh duty- ngei an tum thu an tarlang. Sum leh pai leng nasa lutuk tur ven kawngah theihtawp chhuah an tum thu sawiin, MCC kenkawh kawngah pawh theihtawp an chhuah tur thu an tarlang bawk.

Vawiin thtkhawmah hian MPF, Lawngtlai District Forum hruaitute, Election Agent, MJA- Lawngtlai leh Election Official – te an tel thei a. Pu Donny Lalruatsanga chuan lawmthu sawina neiin hun a khar.