#ZONEWS: Mizo hmeichhe boxer palite laka Coach chet dan avangin POCSO case-in FIR theh luh a ni.

#ZONEWS July 8, 2025: National sub Junior Boys & Girls championship, Haryana-a neih zawh taka hmeichhe boxer pali te chuan an coach Lalthlengliana chet dan avanga an lungawilohna Child Welfare Committee (CWC) hnenah an zualko hnuah Protection of Children from Sexual Offences (POCSO) Act case-in FIR thehluh a ni.

Thudawnnain a sawi danin National sub Junior Boys & Girls a tel tur te hun engmaw chen chu Ramhlun Sports Complex-a Mizoram Boxing Association Boxing Hall-ah hun engmaw chen an camp-a hetah hian an coach hian a boxer te duh loh chung hi an mal te a zut sak a, an awmte pawh a khawih sak bakah a fawh te pawh a fawp lui niin heng boxer hmeichhia te zualkona chuan a sawi.

Haryana lamah pawh coach hian a boxer hmeichhiate inbual lai te luh chilh a tum niin hriat a ni bawk a, an room-a an inthlak zawh hma te pawhin luhchilh a tum bawk a, an mawng te pawh tum tak tak a bensak/chulsak thin niin sawi a ni bawk. Haryana lama a chet dan hi chu Mizoram police lam hian an thuneihna piah lam a nih avangin an khawih tel rih dawn lo.

Boxer pali te zualkona chuan Child Welfare lama an dinhmun an han thlen hian an lo ngai thutak hle tih a sawi a, women cell lamah FIR an thehlut nghal a, Lalthlengliana hi vawiin tlai dar li vel khan man a ni nghal a ni.

Thudawnna chuan Mizoram Boxing Association (MBA) lamin hmeichhe coach atana ruat a ni hi a dik lo hrim hrim a ti a, hei vang hian MBA lakah pawh hian FIR thehlut duh pawh an awm hial maithei a ti bawk.

#zonews #chanchinthar #tualchhung #infiamna