ADVISER TO CHIEF MINISTER-IN ‘MIZORAM KAILAWN 4TH EDITION’ A TLANGZARH

#ZONEWS Aizawl August 08, 2025: Vawiin chawhma khan Pu KC Lalmalsawmzauva, Adviser to Chief Minister chuan a pisaah, mizo thalaiten ngaihtuahna thar hmanga anmahni tan a intodelhna leh midagte tan pawh a eizawnna tha an siam theih nana inelna ‘Mizoram Kailawn 4th Edition’ chu a tlangzarh.

Pu KC Lalmalsawmzauva chuan Mizoram Startup Mission bultuma mizo thalaite cho chhuahna tura ‘Mizoram Kailawn 4th Edition’ buatsaih a ni leh tur chu lawmawm a tih thu a sawi a. Mizo thalaite zing ah thiamna chhawr tlak nei leh ruahmanna thar ngaihtuah chhuak thiam te kaihchhuahna turin Planning & Programme Implementaton Department chuan tum thum lai ‘Mizoram Kailawn’ chu a lo buatsaih tawh thu sawiin thalai mi engemaw zahin an lo tangkaipui tawh thu a sawi a. Intodelhna kawngahte, midang tana eizawnna siam theihtu ni tel bawk, hmasawnna thlen thei ruahmanna thar ngaihtuah chhuaktu ni turin, Pu KC Lalmalsawmzauva chuan mizo thlalaite, ‘Mizoram Kailawn 4th Edition’ a tel tum theuh turin a chah a ni.

Mizoram Kailawn hi Planning & Programme Implementaton Department hnuaiah kum 2017 khan a tum khatna buatsaih niin kum 2018 leh 2019 khan buatsaih chhunzawm a ni a. He inelna kaltlang hian mizo thlalai eizawnna bultan tum mi 60 lai chu sumfai leh an thiamna tuaihriam nan Training-te nen tanpui an lo ni tawh thin a ni. ‘Mizoram Kailawn 4th Edition’ hian Mizoram pum a huam ang a, mimal leh pawl angin inelna hi a tel theih dawn a ni. Dilna hi startupmizoram.com ah emaw Phone number 6909180207 ah August ni 30 thleng a thehluh theih ang. Dilna luh dan a zirin Presentation thazual 30 thleng thlanchhuah a ni ang a, heng thlanchhuahte sum mamawh chu cheng nuai 1 thleng puih an ni ang a. An hmalaknate tihchangtlun lehzual nan MSUM Research & Development and Market Support Fund atangin Cheng nuai 2 thleng dilna an siam thei bawk dawn a ni.