Adviser to CM Dr Lorrain Lalpekliana Chinzah leh Lunglei West bialtu MLA Pu T. Lalhlimpuia te’n Bualte leh Ṭhualṭhu inkar lei minna hmun an tlawh

#ZONEWS Lunglei August 12, 2025: Nimin khan Adviser to Chief Minister (H&FW and Agriculture), Lawngtlai East bialtu MLA Dr Lorrain Lalpekliana Chinzah leh Lunglei West bialtu MLA Pu T. Lalhlimpuia te chuan Bualte leh Ṭhualṭhu inkara lei minin national highway kawngpui a tihpin chu a hmunah tlawhin, khualzin tangkhang mekte harsatna leh khawtlang mamawh thil ṭul leh pawimawh hrang hrang an enpui.

Adviser to CM Dr Lorrain Lalpekliana Chinzah chuan Bualte leh Ṭhualṭhu khawtlangte chu ṭanpuina pawisa fai ₹10,000 ve ve pein, Lunglei West bialtu MLA Pu T. Lalhlimpuia pawhin Bualte leh Ṭhualṭhu khawtlangte ṭanpui nan ₹10,000 ve ve a hlan bawk.

MLA pahnih hi Bualte khawtlang hruaitute’n lo dawngsawngin, inkawm hona hun an hmang a. Dr Lorrain Lalpekliana Chinzah chuan Lawngtlai leh Siaha District chak lakna kawngpui ber hun rei tak tlang hlei thei lo leh buaipui ngaia a awm chu pawi a tih thu sawiin, khualzin tangkhangte duat taka lo buaipui ṭhintu Bualte leh Ṭhualṭhu khawtlang chungah lawm thu a sawi a. Khualzinte chunga ṭhat an chhuah leh an tlawmngaihna chu chhunzawm zel turin a chah.

Pu T. Lalhlimpuia chuan Bualte leh Ṭhualṭhu khawtlangte inpekna chu thil chhinchhiah tlak tak leh Mizo nun ze mawi tipar vultu a ni, a ti a. Chhim mipuite harsatna chu sawrkar hotute leh MLA-te’n an ngaihven reng thu leh an theih ang anga an buaipui thu sawiin, khawtlangin harsatna an tawh pawhin inthlahrung lova MLA-te hnena thlen ṭhin turin a chah bawk.

He hunah hian Bualte VCP chuan lawm thu a sawi a. MLA-te leh sawrkarin an harsatna hriat thiampui a, an ngaihsak ṭhin chu lawmawm an tih thu leh an thlamuanpui thu a sawi.