Aizawl Municipal Corporation (AMC) leh Aizawl Tennis Court kiang vela chawhmeh zuarte inkara buaina chu chinfel a la ni lo

Aizawl Municipal Corporation (AMC) leh Aizawl Tennis Court kiang vela chawhmeh zuarte inkara buaina chu chinfel a la ni lo a, tukin lam pawh khan an innawr leh a ni.

AMC Deputy Mayor Pu Lalringliana hnen atanga Akashvani Aizawl thudawn danin, AMC chu a dinna ngaiah a la ding reng a, ruahman dan chuan July 1, Thawhlehni hian UD&PA Minister leh AMC Mayor te bakah mi pawimawh hrang hrang te nen an sawi ho leh dawn a ni.

Zirtawpni zan khan Aizawl District chhunga khaw hrang hrang bakah Aizawl Tennis Court bul hnaia chawhmeh zuar thinte chu an tih thin dan pangngaiin an kalkhawm leh a, mahse AMC thuneitu lamin inzawrh an phal lohna hmun a nih avangin AMC lamin an dang thung, tlaivarin an indang a, tukin zing dar 9 thleng vel thleng khan indangin a hnuah erawh chawhmeh an zuar chhunzawm leh ta tho a ni.

Kar hmasa leh a hma lama thu awm tawh angin AMC chuan Aizawl Tennis Court leh a chhehvel kawng dungah hian chawhmeh zawrh an phal lo a, khaw hrang hrang atanga kut hnathawktu ten Inrinni atan chauh chawhmeh zawrh nan a hmang thin thung. Kut hnathawk tute hian AMC lamin an thlai zawrhna tur atana hmun an siamsak chu a zim a, an leng lo niin an sawi a. Tukin zinga AMC lamin an dan avang hian nidang aiin an chawhmeh zawrh te chu hralh a harsa deuh niin an sawi.

Source: AIR Aizawl.