Pu Paul L Khuma hoin Serchhip District Scouts & Guides thukhawm

#ZONEWS Serchhip October 22, 2025: Vawiin khan Serchhip District Bharat Scouts & Guides te chuan an President Pu Paul L Khuma, Serchhip DC hoin Serchhip DC Meeting Hall-ah investiture ceremony leh Council Meeting an nei.

President Pu Paul L Khuma hian vawiin programme ah hian Serchhip District Chief Commissioner atan District Education Officer Pu JR Lalhruaitluanga a lalut a. SDEO Pi Melody L Betlu chu Mizoram State Joint Secretary Pi Lalnunsiami Pachuau chuan District Commissioner (G) atan a lalut bawk.

Council Meeting neih chhunzawm nghal niin Serchhip District Bharat Scouts & Guides intawhkhawmna Grand Camp Fire chu December ni 5 zanah LM Comprehensive School-ah neih ni se, tiin an rel a. Tritiya Sopan Camp pawh Serchhip District tan hemi kar vekah December ni 3 atanga tanin ni thum chhung neih ni se, tiin an rel.

Faina Hnatlang chungchang sawiho niin tualchhunga Scouts & Guides ten October 31-ah Serchhip khaw chhung tihfai hnatlang Cleanliness Drive neih ni se, tih chu pawm a ni a. Serchhip Indoor Stadium tualzawlah zing dar 7-ah a hawnna hi District President Pu Paul L Khuma hoin neih a ni ang. Serchhip District chhung school hrang hrangah a remchan dan angin Scouts & Guides Unit thar din belh ni se tiin Council chuan a rel a, District Education Office in hma an la dawn a ni.

Vawiin programme-ah hian Serchhip District Bharat Scouts & Guides Secretary Pu CVL Hruaia chuan report a pe a. Aizawl Headquarters atangin mi pathumin he programme hi an hmanpui a ni.

Attachment