AIZAWL POLICE OFFICER TEN BENGAL EASTERN FRONTIER REGULATIONS (BEFR), 1873 HNUAI A INNER LINE PERMIT (ILP) KENKAWH MEK DAN CHUNGCHANG AN SAWIHO.

#ZONEWS Aizawl August 21, 2025 : Vawiin khan Aizawl khawpui chhunga Sub-Divisional police Officer(SDPO) leh Police Station-a Officer-in-Charge(OC)-te telin, SP, Aizawl office-a Aizawl District Police Officer-te thukhawm chuan Bengal Eastern Frontier Regulations (BEFR). 1873 hnuai a Inner Line Permit (ILP) kenkawh mek dan an sawihona meeting an nei a.

Kumin kum kal mek (2025) chhung hian ILP checking vawi 48 (sawmli leh pariat) neih tawh niin, ILP neilo leh hmangsual mi 281 lai manchhuah tawh an ni a, hengte hi Court hmaah hruai an ni. Police officer kalkhawmte chuan hmalak tawhnate tha thawkhat viau in lang mahse  hmalak thar ngai ni a hriain, hmachhawp atan ILP checking ngawrh zawk a neih an rel. ILP checking neih dan tur ruahmanna siamin, Aizawl khawpui chhunga veng hrang hrangte a veng bil a theih ang a tuam turin ruahmanna siam a ni. Hemi atan hian veng bil Local Council leh NGO hrang hrangte pawh phungbawm a sawm ni se; an ti.

Kalkhawmte chuan tunlai Aizawl District chhunga ILP neih ngai hnamdangte lo luhdan thlirhona an nei nghal bawk a. August ni 20 atang a September ni 11 thleng awh tur, CAPF. SSF leh Assam Rifle Rifleman lakna kal mek, “Combined Recruitment Rally avangin intlar tur candidate 7422 lai Aizawl a an rawn fuankhawm mek chuan ILP dilna a tih tam mai bakah khawlaiah veivak a tihtam thu sawiin, sipai intlar tur a lo lut thalaite hi, sipailak a zawh chuan mahni awmna lama haw leh mai tur a ngaih an nih thu sawilan a ni. He thil avang hian ngaihthatlohna tur a awmloah an ngai a, hetiang a recruitment rally lian a awm leh dawn chuan, candidate ten a tlachawp a ILP dil lo in, online a dil theihna hrilhhriat ni se harsatna tam tak a sutkian a rinawm thu pawh sawilan a ni.

Tin thenawm state-a ramdangmi hnawhchhuahna kal mek in Aizawl District leh Aizawl khawpui a nghawng em tih pawh sawiho a ni a, hmalakna hi Darrang. Dhubri, Goalpara, Golaghat, Hojai, Morigaon leh Nagaon District-te an ni hlawm a, Mizoram atang a hla tak vek an nih avangin, tun dinhmunah chuan min tihbuaina tur hriat a la nih loh bakah heng district atang a lo lut an awm hriat a la nih loh thu sawilan a ni bawk.  Amaherawhchu, fimkhur thuah erawh ILP checking beihpui thlak lai in uluk lehzual a hmalak turin rel a ni.

 Dan lo a lo lut laka inven  chu kan za vaia mawhphurhna a ni a, hnam dang in luahtirtu, sponsor-tu, a chhawrtu leh mimal tinin, dan kengkawhtute  lo pui a, theihtawp a kan ram a him zel theih nan a hma  lak pui turin mitin an ngen bawk a ni.