Lungleiah Art & Culture leh MAL Jt Hqrs huaihawtin “Mizo Inneih Dan Zir Hona” buatsaih a ni

#ZONEWS Lunglei August 21, 2025: Vawiin khan Art & Culture Department leh Mizo Academy of Letter (MAL) Joint Headquarters, Lunglei huaihawtin Lunglei Venglaia A&C Auditorium-ah “Mizo Inneih Dan Zir Hona (Seminar on Mizo Inneih Dan)” buatsaih a ni.

He huna khuallian, Lunglei Municipal Council (LMC) Vice Chairman Pu K. Lalrinawma chuan upa zawkte chu hnamin a thil neih hlu leh chin dan ṭhin vawng ṭhatute an nih angin an hlu hle a ni tiin, upa zawkte zah nachang hriat a pawimawh thu a sawi a. Pathianin hnam ziarang leh tih dan tur a duan chu hnam rohlu a ni tih hriat thar a, roh leh ngaih pawimawh a ṭul thu a sawi a. Sazaikawnah LMC Complex sak tum a nih thu te, Hrangchalkawnah Truck Terminal siam tum a nih thu te, Lunglei Ramthar Vengah Market Shed sak tum a nih thu te, Saikuti Hall chei ṭhat nan cheng vaibelchhe 5 ruahman a nih thu te sawiin, LMC hma lakna hrang hrangte a tar lang bawk.

Seminar hi MAL Jt Hqrs Lunglei President Pu C. Hrangdula’n a kaihruai a. UPC (NEI) Lunglei District Superintendent Rev. C. Lalrintluanga’n hunserh a hmang.

Vawiina “Mizo Inneih Dan” tih thupui hmanga seminar buatsaihah hian MAL Jt Hqrs Lunglei Secretary Pu TC Zonunsanga leh Treasurer Pu R. Hmingliana te’n thuziak (paper) an buatsaih chu zir ho niin, zawhna leh chhanna hun bakah, sawi hona hun hman a ni bawk.