Lunglei-ah kum 2025–2026 atana oil palm chin runpui, ‘Mega Oil Palm Plantation Drive 2025’ kalpui tur bul ṭanna leh hawnna hun hman a ni

#ZONEWS July 25, 2025: Nimin khan Agriculture & Farmers Welfare (A&FW) Department, Lunglei District leh Patanjali Foods Ltd ṭang kawp huaihawtin Lunglei Convention Centre-a Convention Hall-ah kum 2025–2026 atana oil palm chin runpui, ‘Mega Oil Palm Plantation Drive 2025’ kalpui tur bul ṭanna leh hawnna hun hman a ni a. Agriculture & Farmers Welfare Minister Pu PC Vanlalruata’n hun hmanpuiin, oil palm ṭiak chin tur Lunglei District zau hrang hranga sem chhuah tur chu a vai liam bawk.

A&FW Minister Pu PC Vanlalruata chuan kut hna thawktute tana hma laknaah kawng dik lo zawh palh a awm loh nan fimkhur a ṭul tih sawiin, Mizoram sawrkar chuan kut hna thawktute kawng dik taka hruai turin theih tawpin hma a la mek tih a sawi a. Mizoram Bana Kaih hnuaiah thlai thar hralhna ngaihtuah niin, kut hna thawktute’n a hlawkna an tel chhoh mek bakah, thar chhuah lamah pawh hmasawnna hmuh a ni, a ti a. Thei, thlai, thil thar chhuah leh siam chhuah reng reng a deh ral remchang tur chuan a hlawma tam tham tak thar chhuah (mass produce) a ṭul tih sawiin, chumi lam hawi chuan agriculture leh a kaihhnawihah sawrkarin hma lakna a kalpui mek tih a sawi a. Hriak ei chi (edible oil) chu India ramin a mamawh tam leh a intodelh lohna, a lak luhna atana sum tam tak a hmanna a nih avangin sawrkar laipuiin hmalakna hran hlak, ‘Mission on Edible Oil’ a ruahman hnuaiah hma lak chhoh mek a nih thu tar langin, Mizoram hmar lamah tung chin leh chhim lamah oil palm chin kalpui a, hriaka ram intodelhna tur bakah kut hna thawktute’n hlawkpui tham thar chhuah an neih theih nan hma lak chhoh mek a nih thu a sawi.

Minister Pu PC Vanlalruata chuan oil palm-in ram a tichhia nia sawi awm ṭhin mah se, kut hna thawktute tana hlawk leh an nun khaw chhuahna tur a nih avangin sawrkar leh department-in a ngai pawimawh lo thei lo tih a sawi a. Mizorama oil palm chin theihna hmun chu Mizoram zau zawng aṭanga hmun zaa hmun thum (3%) chauh a nih avangin ramin a chhiatpui khawpa hma lakna tur a awm loh thu sawiin, sawrkar laipuiin Mission hran liau liau dina hma a lakna a nih avangin oil palm chin chu a sual loh thu leh sum deh chhuahna ṭha tak a nih thu a sawi a. Kut hna thawktute chu tung leh oil palm chin danah mi thiam te’n a kung inhlat zawng tur leh enkawl dan tur an sawi chu ṭha taka zawm tura chahin, sawrkarin kut hna thawktute thar chhuah hlawk zawk a awm theih nan thlai dang nen chin pawlh theih dan tur a zir chian mek thu te, inkal pawhna kawng ṭha, tui lak ṭha leh a hralhna tur te nen theih tawp chhuaha sawrkarin a um zui zel tur thu te a sawi a. Kut hna thawktute chu ngaih ngam tak leh ṭhahnem ngai taka hma la turin a chah.

Minister hi Lunglei West bialtu MLA Pu T. Lalhlimpuia bakah, Lunglei Municipal Council (LMC) Chairman Pu Lalzuithanga leh councillor-te, Agriculture & Farmers’ Welfare Department leh Irrigation & Water Resources Department hotute’n an ṭawiawm a. Sawrkar official-te, Patanjali Foods Ltd-a thawktute leh oil palm chingtute he hunah hian an tel.

Lungleia Mega Oil Palm Plantation Drive 2025 hawnna hi A&FW Department Director Pu R. Lalnunzira’n a kaihruai a. A&FW Joint Director Pu B. Ramnunsanga’n Mizorama oil palm chin kawnga sawrkar hma lakna tar langin, oil palm chu hriak nei thlai zinga thar hlawk ber a nih thu leh sawrkarin a chingtute puihna tur ṭha tak a ruahman thu a sawi a. Patanjali Foods Ltd ai awhin Pu Timothy Laldailova’n an hma lak dan report pein, I&WRD Secretary Er Lalrothanga leh Lunglei District Oil Palm Zonal Committee Chairman Pu V. Kapchungnunga te pawhin thu an sawi a. Lunglei District-a oil palm ching hlawhtling mi panga – Pu Lalrinthanga (Khawmawi), Pu B. Vanlalhruaia (Lungsen Chhimveng), Pu Lalbiakngheta (Ṭawipui North-I), Pu PC Vanlalhnema (Tlabung Zodin) leh Pu ZD Sawiluaia (Bunghmun) te hnen aṭangin oil palm chin kawnga an tawn hriat ngaihthlak a ni a. Lunglei District Agriculture Officer Pu VL Hmangaihchhunga chuan lawm thu sawiin hun a khar a ni.

He huna tar lan a nih danin, India ramin ram dang aṭanga hriak ei chi (edible oil) a lak luh tihtlem nan oil palm chin kawnga hma la thar tura scheme thar, ‘National Mission on Edible Oils – Oil Palm (NMEO-OP)’ a duan hnuaiah, Mizoramah pawh kum tina tlangram lo neih tihtlem nan leh hriak hmanga intodelh a nih theih nan hma lak chhoh mek a ni a. Mizoram sawrkar chuan tunah hian Patanjali Foods Ltd te nen thawh hona ṭha tak kalpuiin, kut hna thawktute chu a bul ṭan phat aṭanga hma lakpuiin, a chin tur a ṭiak leh a enkawl zuinaa puihna te, a hralhna tur te thlengin ngaihtuahpui ṭhin an ni.

Patanjali Foods Ltd hian Lunglei District chhungah Kauchhuahah oil palm kui ṭiahna (nursery) neiin, tunah hian oil palm ṭiak nuai khat chuang an nei a. Hei hi ram hectare 712-a zauva chin theih tura ngaih a ni a. Lunglei District-ah kum 2014–2025 chhungin hectare 305-a zauvah oil palm chin belh niin, a rah metric tonne 258 (quintal 2588) thar chhuah a ni a. Kum 2025–2026 chhungin hectare 196-a zauvah oil palm phun thar leh tawh niin, a rah metric tonne 271 (quintal 2717) thar chhuah tawh a ni bawk a. Chhungkaw 340 hnen aṭangin oil palm hi lei tawh a ni.

Darkar khata oil palm rah metric tonne 5 her thei tur factory chu Lawngtlai District-a Liaphaah bun turin Patanjali Foods Ltd chuan hma la mekin, kum 2027-ah hawn hman beisei a ni a. Factory a awm hun chuan oil palm deh ralna kawngah pawh kut hna thawktute tana hlawk zawk leh awlsam zawka kalpui theih beisei a ni.