Serchhip DC in vawk leh vawksa atanga ei tur siam lakluh a khap

#ZONEWS Serchhip August 11, 2025: Mizoram District thenkhat ah Vawk hri, African Swine Fever (ASF) avangin vawk tam tak thi leh tawhin engemawzat suat a ni tawh a. Serchhip District chhunga kan ran vulh te an lo him zel theih nan Serchhip District Magistrate Pu Paul L Khuma chuan Section 163 of Bharatiya Nagarik Suraksha Sanhita, 2023 tlawhchhanin a hnuaia thupek hi a chhuah:

1. Serchhip District chhungah ram dang (Foreign countries), State dang leh District dang atangin Vawk, Vawksa leh Vawksa atanga siam eitur reng reng lakluh khap tlat a ni.
2. Serchhip District chhung khua leh khua-a vawk inlakpawh turte reng rengin A.H & Vety Department a thawk te emaw khawtlang hruaitu Village Council te hnen atangin ran hrisel ngei a nih hriatpuina an la ngei tur a ni.
3. Vawk hrisel tha chauh talh tur a ni a. Vawk damlo reng reng talh tura sawngbawl loh tur a ni.
4. Vawk damlo leh thi reng reng chu A.H & Vety Department a thawktu te hnenah hriattir vat tur a ni a. Vawk thi reng reng uluk takin Disinfectant (chinai) nen thuk taka phumbo tur a ni.

He thupek hian thu leh awm hma chu Order chhuah a nih atanga thla 2 (two months) chhung a huam ang.

He thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang.