Category: Sawrkar

#ZONEWS July 19, 2025: Petrol leh Diesel van avanga Hnahthial District mipuiten harsatna an tawh loh nan Hnahthial Bawrhsap, Pi K. Vanlalruati chuan ahnuai ami ang hian thupek a chhuah.

Hnahthial District tun dinhmunah Oil (Petrol leh Diesel) mamawhna a sang a, mipuiten Oil chungchangah harsatna an tawh loh nan leh rualkhai taka Petrol/Diesel an hmuh theih nan “The Mizoram Trade Article (Licensing and Control) Order, 1987″ para 24 leh 25 tlawhchhanin POL Control Order hi siam a ni.

#ZONEWS July 18, 2025: Vawiin khan Pu Vanlalhlana, Hon’ble Minister, PWD, Transport leh Parliamentary Affairs chuan Darlak leh Tuidam kawnga harsatna awmte a hmuna kalin a tlawh a, PWD Minister hi Tuidam PWD IB-ah khawtlang hruaitu, tlawmngaipawl aiawh te’n kawmna an nei zui a ni.

Pu Vanlalhlana chuan Darlak leh Tuidam kawng chhiat avanga harsatna awm chu ngaihthah chi a nih loh thu sawiin, a thawmthatna hna thawh tan nan Rs 20 lakh ruahmanna siam nghal a ni a ti a, kawng siam tha turin ni hnih khat maia chinfel theih a ni lo a, furpui hmachhawn lai a nih avangin quarry atanga lung phurh chhuah pawh duhthusama kalpui a harsat rih a rin thu a sawi. NH 44A kawngsial duhthusama hlawhtlinna hmuh tak loh thawhzuina turin PWD lam hotute’n theihtawpin hma an la mek zel a ni a ti bawk.

#ZONEWS July 18, 2025: Vawiin khan Kolasib District Senior CMO office,H&FW Dept. chuan Saihapui K ah TB Mukt Bharat Campaign (TB umbo beihpui thlak na) hun an hmanga. He hunah hian Integrated Health Campaign Kick off na hun Senior CMO in a nei nghal a ni.

He outreach programme hi Dist. TB centre, MSacs, MMU leh Urban PHC Kolasib te nen tangho a hman a ni a. Outreach programme ah hian Dr HC Lalnunhlua Medicine Specialist leh Dr Saron, MO UPHC ten damlo te an en a, damlo inentir mi 241 an awm in an vai hian Chest Xray tihsak an ni a TB rinhlelh mi 13 hmuhchhuah an awm bawk a ni.

#ZONEWS July 18, 2025: Vawiin khan Public Health Engineering Department Minister, Professor Lalnilawma Khiangte leh Minister Pu Lalnghinglova Hmar, Aizawl West-II bialtu MLA ni bawkte chuan Vaivakawn (Zohnuai) lei tlak hniamna hmun an tlawh a, lei chein a tih chhiat Aizawl khawpui hmar lam chawmtu Aizawl Water Supply Phase – III, tui pipe chhia siam that dan tur chungchang ngaihtuahin an thukhawm. He hunah hian PHED, SIPMIU, DC Office leh DM&R atangtein sawrkar mi pawimawhte an tel bakah Vaivakawn, Zohnuai khawtlang hruaitute leh lei chet avanga harsastna tuartute an tel a ni.

#ZONEWS July 18, 2025: Sawrkar laipuia Ministry of Culture in June Ni 25 chu Samvidhan Hatya Diwas (Constitution Murder Day) a a lo puan tawh behchhanin Champhai District-ah pawh he ni pual hian vawiin khan Govt. GM Higher Secondary School exhibition buatsaih a ni.

Samvidhan Hatya Diwas puala exhibition buatsaihah hian India ram indin chhohna kawnga mipuite duhthlanna dah pawimawh a nih ṭhin dan te, ram zalenna sualtute sulhnu thenkhat bakah Kum 1975 National emergency puan a nih lai chanchin thenkhat phochhuah a ni. Zirlai naupangte bakah mipui tam takin he exhibition hi chhimin signature board an tarah an hming an ziak theuh bawk a ni.

#ZONEWS July 18, 2025: Vawiin khan Kolasib District Deputy Commissioner Pu Robert C. Lalhmangaiha chuan Kolasib District-a National Highway 306&06 Kawnpui to Khamrang kawng chhe laite a hmunah kalin a enfiah.

Kolasib District-a National Highway 306&06 Kawnpui to Khamrang kalkawng hi Assam State leh Mizoram State inpawhna kalkawng pawimawh tak niin nitin Mizoram State mamawh leh chakkhai chawkluhna kalkawng pawimawh tak a ni a. Tun dinhmunah he lai kalkawng hi fur khawchhia leh leimin in a nuai nasat avangin lirthei khalhtute’n harsatna an tawk mek a, tangkhang engemaw zat pawh an awm bawk a ni. He harsatna sukiang tur hian NHIDCL Contractor BR Goyal Construction Company chuan kawngpui thawmthat hna hi an thawk leh mek a ni.