CENTRAL UNIVERSITY HRANG HRANG HNUAIAH SC/ST/OBC TE TANA HNA HAUH BIK POST RUAK A TAM; PROFESSOR POST HNAWHKHAH LOH – OBC TAN 80%, ST TAN 83% ZET A AWM

#ZONEWS July 25, 2025 Zirtawpni: Nilaini kal taa Parliament-a hriattir a nih dan chuan, Central University hrang hrangah Caste hrang hrangte tana Professor post hauh leh ruat sa atangin hnawhkhah loh a tam hle a. OBC category tan 80% leh Schedule Tribe (ST) category tan 83% dawn post ruak a awm thu parliament hi hriattir a ni.

Professor bakah hian ST leh OBC te tana hauh bik Associate Professor post pawh hnawhkhah loh a tam hle. ST Category tana Associate Professor Sanction Post awm zat atanga 65% zet a ruaka, Post awm zat 307 atangin 108 chauh hnawh khah a ni. OBC Category tana Associate Professor post 69% zet a ruak bawk a, post awm zat 883 atangin 275 chauh hnawhkhah a ni ve bawk. SC Category tana Associate Professor Post hauh bik 52% zet a ruak bawk a, Post awm zat 632 atangin 308 hnawhkhah a ni.

Heng Category-wise data te hi RJD MP Pu Manoj Kumar Jha zawhna, Union MoS for Education Pu Sukanta Majumdara’n chhanna Rajya Sabha-ah a pek dan a ni a, data-te hi June 30, 2025 anga chhan a ni.

OBC Category tana Professor Sanction Post 423-ah 84 chauh hnawhkhah a ni a. Schedule Tribe (ST) tana Professor sanction post 144-ah 24 chauh hnawhkhah a ni bawk a. Tin, Scheduled Caste (SC) category tana Professor sanction post 308-ah 111 chauh hnawhkhah a ni bawk.

General Category-ah Professor post 39% a ruak a, sanctioned post 1538-ah 935 hnawhkhah a ni.

General Category-ah Associate Professor post 16% a ruak a, sanctioned post 3013 atangin 2533 chu hnawhkhah a ni.

Assistant Professor bikah SC/ST/OBC category te tana post hauh chu ruak a tlem hle a, OBC tan 23% ruakin Post awm zat 2382 atangin 1838 chu hnawhkhah a ni a, ST tan 15% ruakin Post awm zat 704 atangin 595 hnawhkhah a ni bawk a, tin, SC tan 14% a ruak a, post awm zat 1370 atanga 1180 chu hnawhkhah a ni bawk.

Heng hna lak turte hi Open Advertisement hmanga chhuah a ni thin a. Selection committee kaltlangin hnathawktu tur hi lak a ni thin a ni.