CHAKNA DIK TAK CHU RINNA NENA FIAHNA TUAR CHHUAKA PALTLANGNA ATANGIN A RAWN PIANG ṬHIN.

#ZONEWS #FIANRIAL August 11, 2025:

CHAKNA DIK TAK CHU RINNA NENA FIAHNA TUAR CHHUAKA PALTLANGNA ATANGIN A RAWN PIANG ṬHIN.

Vawiin kan fianrial hunah chuan Jeremia’n Judate tihchhiata an awm lai, an tluchhe lai, Pathian venhimna chang chunga a hriatpui chungchang ngaihtuah ang aw. Lal Nebukadnezzara leh a sipai rualte chuan Jerusalem chu an tichhia a, sang tam tak manin salah an hruai a, an hruailoh Juda hruaitute chu tihhlum vek an ni bawk a. Chutikhawpa buaina nasa karah chuan, Pathian chuan Jeremia chu a hum tlat a, nuam taka Babulon rama khawsak emaw, a mite nena khawsak emaw duh thlan theihna Pathianin a pe hial a ni.

PATHIAN CHUAN A VENGHIM TLAT ṬHIN
Mahse LALPA chu mi huaisen hlauhawm tak angin ka hnênah a awm a, Mi tiduhdahtute chu an tlu ang a, mi hneh lo vang. Mualpho takin an awm ang a, an hlawhtlin dawn loh avângin, An kumkhaw hmingchhiatna chu theihnghlilhin a awm lo vang (Jeremia 20:11).

I vela thil zawng zawngte chhe vek dawnin lang ta se engtin nge I tih ang le?

Hmelmaten nasa taka an beihna kara Pathian venhimna leh A rinawmzia entirna chiang tak chu Judate tlukchhiat laia Jeremia chanchin hi a ni. Lal Nebukadnezzara leh a sipai rualten Jerusalem an tihchhiat vek a, sang tam tak sala an hruai a, Juda hruaitute an tihhlum laiin, Pathian venhimna kut chuan Jeremia chu a chelhin a hliah khuh tlat a ni.

Sala a tan lai pawhin Jeremia chuan Pathian thu a dawngin a puang chhunzawm reng tho a. A tihtur chu ama mimal himna aiin a pawimawh zawk a ni tih a hre chiang hle. Pathianin Jeremia chu a patea, Hanamela hnen atanga ram lei turin a ti a. Hei hi chhungkaw ram in lei sak satliah mai ni lovin, Pathianin Juda ram chu a la dinthar leh dawn a ni tih an hriatna tura beiseina entirna thupuan a ni nghal bawk a ni.

Pathian thu kan awihna avangin hloh kan nei ve fo tawh ṭhin em?

Rorelna in kawngkhar an tihchhiat lai pawhin Pathian chuan Jeremia chu a humhim tlat a. Nasa taka sawisain taninah khung mahsela Jeremia rinna chu a phet ngai hek lo. Lal Zedekia nen an inchapcharna hian, lawm loh nihna hmunah, thiltitheitu leh thuneitute lak pawh thudik dinpui tlat tura chona hmachhawn dan tur chu a takin min entir a ni.

Midangte nen inkalhin in mil lo dawn pawh ni ila, kan rinna hi nghet takin kan dinpui ve thei ang em?

Kan nun ngei hi inen ta ila: Chhiatna emaw, beidawnnain emaw min hual vel nia inhriatna hmunte kan nei ve em? Pathian ven himna leh khawngaihna, kan rin lohna lam kawng atanga lo lang thin chu ngaihtuah ila. Jeremia chanchin hian, hun thim ber lai pawha rinawm tlatte chuan Pathian enkawlna an chang thin tih chiang takin min hrilh nawn a ni.

NGUN TAKIN INNGAIHTUAH ILA!
Kan nuna hmelmate leh chhiatna lo thleng kan hmachhawna kan chhanlet thin dante ngun takin ngaihtuah teh ang. Engkim a tlakchhe vek nia kan hriatna dinhmunah kan ding ve tawh em? Jeremia rinna nghet tak leh Pathian venhimna hi ngaihtuahin hre reng ang aw. Chona leh harsatna kan hmachhawn tawh leh hmachhawn mek piah lama Pathian kutchak tak chu kan hmuh fiah a, rinnaah chuan nghet taka kan din theihna turin Pathian hnenah chakna dilin tawngtai ang aw.

ṬAWNGṬAINA
Jeremia erawh chuan, “An mantir lo vang che; i hnêna ka sawi LALPA aw hi awih mai rawh. Tichuan i tan a tha ang a, i nung bawk ang (Jeremia 38:20).

Aw Lalpa, Ka thlarau tana chaw tha leh nunna, Bible-a I thute avangin lawmthu ka hrilh a che. Ethiopia mi tilreh ang bawka, I thu ka chhiarte hriat thiamna min pek avang leh hriatthiam theihna kawng min hawn sak zel dawn avangin lawmthu ka hrilh bawk a che. Miten khuarkhuruma min paih luh a, ka nihna leh ka hming tihchhiat tuma an beihin, nang chuan ngilneihna leh inngaihtlawmna thuama hmangin khur thuk tak atanga chhuahna kawng min siamsak thin avang leh min siamsak zel dawn avangin lawmthu ka hrilh a che. Eng thil pawh ka kawngah chuan lo kal sela, Aw Lalpa, Nang chuan I lo thawk zo vek tawh a, chu I hnathawh zawh tawh saah chuan min chawlhtir thin a, Pathian fa, I fa ka nih avangin muang takin min awm tir thin si a. Isua hmingin, Amen!