Champhai District Narco Coordination Centre Committee an ṭhukhawm

#ZONEWS Champhai July 25, 2025 Zirtawpni: Vawiin khan Champhai District Narco Coordination Centre Committee (NCORD) chu DC Conference Hall, Keifangtlangah an ṭhukhawm a. Bawrhsap Pu Mohammad Aaquib chuan he hun hi a kaihruai a, District chhunga ruihhlo do kawnga hmalakna hrang hrang te thlirho a ni.

Ṭhutkhawm kaihruaitu Pu Mohammad Aaquib chuan Champhai District chu ramri hrula awm a nih angin ruihhlo do kawngah tha thlah lo a ṭan mar reng a ṭul tih a sawi a. NCORD member-te chu an theihna zawn ṭheuhah theihtawp chhuah turin a ngen a, thawhhona ṭha tak vawng nung reng turin a chah bawk a ni.

Vawiin ṭhutkhawma tarlan danin, July ni 1 atanga ni 25 chhung khan Champhai Police te chuan ruihhlo kaihhnawih case 8 ziak lutin, he mi kaihhnawihah hian mi 17 an man a. An hnen aṭang hian Heroin kg 7.855 leh Methamphetamine kg 78.95, ₹1,26,200,079 man hu an man a ni. Heng ruihhlo phurh nan a hman lirthei two wheeler pahnih, car pathum leh 709 truck pakhat an man bawk a ni.

Zokhawthar Police-te chuan July ni 10, 2025 khan Mizorama la hmuh ngai loh Heroin quality sang DOUBLE UOGLOBE BRAND brick 20 (sawmhnih) zet, kg 7.422 a rit chu Kudamsen Kai, Zokhawthar bulah an man a, he ruihhlo man kaihhnawihah hian mi panga man an ni. He ruihhlo man hi Asia Pacific Drug sumdawnna hmun hrang hranga hriat lar tak a ni. He mi hun chhung vek hian Excise & Narcotics Department te chuan ruihhlo kaihhnawih case 12 ziak lutin, mi 15 an man a, an hnen aṭang hian Heroin Kg 1.559 leh Methamphetamine kg 11.21 an man bawk a ni. Excise & Narcotics Department hian July thla chhungin Anti Drugs Awareness campaign tum hnih Naupang Sunday School, Presbyterian Church, New Champhaiah leh Govt. Vengthlang Middle School, Champhaiah te an buatsaih bawk a ni. Assam Rifles pawhin ruihhlo leh a kaihhnawihah dan chah a ni theih nan chak tak a hma lain tum engngemawzah an thawk chhuak a ni.

Vawiin NCORD meeting-ah hian ruihhlo dona kawnga thawktu ten an hmalakna leh harsatna hrang hrang an tawh te an sawiho a, sawrkar department leh tlawmngai pawl inkara thawhhona ṭha a awm zel theih dan tur pawh sawiho a ni bawk.