Champhai District NCORD Committee an thukhawm

#ZONEWS Champhai August 22, 2025: Vawiin khan DC Conference Hall, Keifangtlangah District Level Narco Coordination Centre (NCORD) Committee ruihhlo tawlh ruk chungchang sawiho turin an thukhawm a, Champhai Bawrhsap leh District NCORD Committee Chairman ni bawk Pu Mohammad Aaquib-a’n a kaihruai.

He thutkhawmah hian Champhai Police Department leh Excise & Narcotics Department te’n ruihhlo an man tawh zat an sawi a, Police hian August 2025 chhungin NDPS Act (Narcotics Drugs and Psychotropic Substances Act) hnuaiah case 5 ziaklutin mi 9 an man a, ruihhlo man zat hi ₹59,70,000 man hu a ni. Excise & Narcotics office hian NDPS Act hnuaiah case 7 ziaklutin mi 5 leh motor 2 an man a, heroin gram 356.57 leh methamphetamine gram 14.443 man a ni. Inhrilhhriatna hun pawh tha taka kalpui zel niin veng tinah neih thin a ni tih Champhai Police chuan an tarlang a, Social Welfare Offfice chuan Ngaizawlah inhrilhhriatna hun leh Govt. Champhai College leh DIET, Champhaiah thisen pek runpui an nei tih an tarlang bawk.

Champhai Police chuan Champhaia ruihhlo tawlh ruk dan kawng tam tak a awm a ni tih sawiin office hrang hrang, Police te, Excise & Narcotics te, Assam Rifles te leh Customs te thawhho that a tul thu an sawi a. Heng bakah hian COTPA, The Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 chuan meizial hralh tih tlem a tum angin naupang leh tleirawl te a bikin meizial laka fihlim tura inzirtirna neih a tul tih an rel a, Education Department te’n zirtirtute pawh meizial zuk insuma naupangte fihlim tur zirtir tha tura an fuih a tul thu sawi a ni bawk.

Chairman Pu Mohammad Aaquib chuan department lo kalkhawm te chungah lawmthu a sawi a, tha taka ruihhlo do kawngah thawkho zel turin a sawm a, thlaleh thutkhawm hunah hmasawnna a awm ngei a beisei thu a sawi a ni.

He hunah hian Champhai SP Pu Lokeshwaran R a tel a, line department hrang hrang bakah khawtlang leh kohhran hruaitute pawh an tel a ni.