Lunglei District Bawrhsapin Lunglei Officers’ Club (LOC) Sports 2025 kharna hun a hmanpui

#ZONEWS Lunglei August 22, 2025: August ni 20 – 21, 2025 chhunga buatsaih Lunglei Officers’ Club (LOC) Maiden Sports 2025 chu nimin tlai khan a hmawr bawk fel niin, Circuit House Conference Hall-a a kharna hun buatsaih chu Lunglei District Bawrhsap, LOC Patron ni bawk, Pi Navneet Mann chuan a hmanpui.

LOC sports hmasa ber kharnaa khuallian, Patron Pi Navneet Mann chuan officers’ club sports chu intihhlimna satliah mai ni lovin, department hrang hrang aṭanga kal khawm member-te’n infiamna kal tlanga inhmelhriatna ṭha an neih a, District tana an thawhnaah thawh hona ṭha zawk a awm theih nan a pawimawh tih sawiin, LOC sports hlawhtling taka buatsaih a ni chu lawmawm a tih thu a sawi a. LOC-in zirlaite tana career awareness programme an kalpui te, mi harsate ṭanpuina tur thawh khawma an sem ṭhin te chu ropui a tih thu sawiin, thil ṭha tih chhunzawm zel turin a chah.

LOC Sports 2025 kharna hun hi Assistant Secretary, Lunglei DIPRO Pu C. Lalhruaitluanga’n kaihruaiin, Secretary & Sports Convener, Lunglei DLAO Pu Beitlotha Nohro chuan report a pe a. Team champion nomawi leh intihsiakna hlawm (category) hrang hrang lawmman sem a ni a. Pi C. Luri leh Pi Lalenkawli Pautu te’n kal khawmte zaia awiin, LOC President, 2nd Bn MAP Commandant Pu Francis Lalnuntluanga Ralte chuan lawm thu sawiin hun a khar a. Chawhlui kil ho zui a ni.

LOC Sports 2025-ah hian LOC member-te chu team pathum – Chuailo (Black), Senhri (Red) leh Tlaizawng (White)-ah inṭhenin, intihsiakna chi (item) hrang hrang paruk – badminton, carrom, chinese checkers, playing card (indawl chuh), dart throw leh air rifle shooting hmangin an inel a. A pum puiah Senhri chuan Team Gold 3, Team Silver 1 leh Team Bronze 2 lain, Team Champion nomawi an la a. Pahnihna Chuailo-in Gold 2, Silver 2 leh Bronze 2 lain, pathumna Tlaizawng-in Gold 1, Silver 3 leh Bronze 2 an la thung.