Champhaiah Har Ghar Tiranga pualin bike rally buatsaih a ni

#ZONEWS Champhai August 11, 2025: Vawiin khan India national flag chawimawina leh mipui hnena thlenna beihpui, Har Ghar Tiranga pualin DC Office chuan bike rally a buatsaih a, Champhai Bawrhsap Pu Mohammad Aaquib chuan a vailiam.

New Champhaiah bike leh scooty khalhte chu inhmukhawmin SDO (Sadar) Pu Ngulzathuama’n thu a sawi a, India national flag hi kan zalenna tilangtu, kan ram timawitu a ni tih a sawi a, chu chu bike rally hian mipuite thinlungah a tihlan thar ngei a beisei thu a sawi a ni.

He hunah hian Buffalo Riders, 04 Riders leh 04 Girls te sawm bik an ni a, pisa hrang hranga thawk te an tel bawk a ni. Bike leh scooty-ah hian national flag tar hlawm a ni a, New Champhai atangin Kahrawt Volleyball Court thleng an khalh a, Addl. DC Pu K. Zorammuana’n hma a hruai a ni. An thlen hmunah hian Addl. DC chuan rider pawl te hnenah lawmman a sem a, SDC Pu Lalchhuanawma Ralte chuan thu tawi sawiin hun a khar a ni.