CHIEF MINISTER HOVIN HIGHER & TECHNICAL EDUCATION HMALAKNA TE SAWIHO A NI

#ZONEWS Aizawl July 25, 2025: Nimin khan Chief Minister Pu Lalduhoma kaihhruaiin DP & AR Minister Pu K. Sapdanga, Higher & Technical Education Minister Dr. Vanlalthlana leh Official pawimawhte chu Higher & Technical Education hmalakna hrang hrang te sawiin CM office-ah an thukhawm.

NIT Mizoram Campus chungchang report pek a ni a. Kum 2009 ah Lengpuiah Campus sak bultan a ni a, kum 2017 ah forest clearance nei lo va hnathawh avangin hna hi tihtawp a ni. Kum 2021 ah forest clearance dil (Application of diversion of reserve forest) a ni a, kum 2023 ah Mizoram sawrkar chu Rs. 20 crore chuang chawi tura tih a ni ta a. Nimahsela Chief Minister Pu Lalduhoma hmalakna zarah Forest Advisory Committee chuan penalty hi Rs 1.4 crore chauh chawi turin a rawn ti ta a ni. Pawisa chawi tur hi deposit vek tawh a niin hnathawh chhunzawm theih thuai beisei a ni.

Mizoram State University chungchang sawi a ni leh a, New Education Policy, 2020 chuan kum 2036 hmaa nei turin state tin te chu a phut avangin neih ngei a ngai dawn a. Aizawla College pahnih pathumte zawmkhawm a, School pali vel hawnga Post Graduate zirna hi bultan tum a ni. Mizoram State University (MSU) hmunpui atan hian tuna Geology & Mining ram, Luangmual chu ruahman a ni a, Geology & Mining hi MINECO ah hmunhma pek an ni thung. MSU hmunhma thar hi peih fel a nih hma chu Govt. Aizawl College building, Sikulpuikawn chu Administrative Building atana lo hman lai lawk mai tha an ti a. A bul lo tan a, a tul apiang lo thawktu turte ruat (appoint) thuai a ngai dawn nia sawi a ni.

Mizoram Polytechnic Lungleiin harsatna a tawh mek chungchang sawi a ni a. Supreme Court hearing hi a awm hnai dawn a, tha taka inbuatsaih a ni.

Mizoram Engineer College chungchang sawi a ni a. Engineering College hi nakkum Academic Year atanga kalpui tan theih tumin chak taka hmalak mek a ni. A hmunhmate thawm that nan Mizoram sawrkar chuan Rs 2541.19 lakh tun hnai khan a pe a. Hna an thawk tan thuai anh. He college ah hian Civil, Mechanical, Electrical leh Computer Science & Engineering course ah te seat 30 theuh neia bultan tum a ni.

Mizoram Scholarship Board chungchang sawi a ni a. Post Metric ST scholarship hi kum 2023-24 ah dilna 31652 dawn a ni a, a hmu turin mi 27652 thlan an ni. Sum pek chhuah zat hi Rs. 3497.69 lakhs a ni. La pek loh mi 4000 te chu Additional Fund hmuh a nih hunah pek an ni ang.

Kum 2024-25 ah dilna 28471 dawn a ni.

Pre Metric Scholarship hi kum 2023 – 24 ah zirlai 8911 in an dil a, a dawng turin mi 8148 thlan an ni. Pawisa hi Rs. 313.64 lakh sem tawh a ni a, a la dawng lo mi 763 te chu Additional Fund hmuh a nih hunah pek an ni ang.

Kum 2024-25 ah hian zirlai 8807 in an dil mek a ni.

State sawrkarin scholarship a siam bikah, Post Metric Scholarship hi mi 58 hnenah Rs 3.77 lakh, Mizoram Research Fellow mi 7 hnenah Rs 64000, RIMC tanpuina mi 4 hnenah Rs 2.77 lakh leh Sainik School Chhingchhipah naupang 233 tan Rs 280.42 lakh chu pek a ni.

Assistant Professor, Qualify lo te chungchang sawi a ni a. Tunah hian part time 24, contract 3, Mizoram Polytechnic 3 leh Law College 1 an awm mek. Show Cause notice hi 3.7.25 khan pek vek an ni. Part time a thawk mi 10 ten petition an file a, court thutlukna hi ngaihchan mek a ni.

Mizoramah hian H&TE enkawl UGC approved college hi 23 an awm mek a, Grade A+ college 1, Grade A college 3, Grade B++ college 2, Grade B+ college 2, Grade B hi college 10 leh Grade C college 2 an awm mek.