Pawisa thir cheng 10 leh cheng 20 chungchanga Lunglei Bawrhsap aṭanga mipuite hriattirna

#ZONEWS Lunglei, July 25, 2025: Mizoram State Level Security Committee ṭhut khawm vawi 25-na thu rel ang leh Reserve Bank of India leh Home Department lehkha zul zuiin, nimin khan Lunglei District Bawrhsap Pi Navneet Mann chuan a hnuaia mi ang hian Lunglei District mipuite zawm tur hriattirna a chhuah.

“1. India Sorkar chuan Reserve Bank of India hmangin pawisa thir chi hrang hrang a siam a, chung zingah chuan cheng sawm leh cheng sawmhnih thirte pawh hi a tel a. Mipui vantlang zingah heng pawisa thir chungchanga ngaihdan dik tawk lo nei, dawng duh lo emaw, thil lei leh hralh kawnga harsatna siam an awm ṭhin tih hriat a ni.

“2. Sorkar laipuiin a siam heng pawisa thirte hi Coinage Act, 2011 hnuaiah thil lei leh hralhnaa hman tur leh pawm tlan vek tur a nih thu ṭum khat mai ni lo, mipui hriat tura puan chhuah a lo ni tawh ṭhin a. An pianhmang leh lan dan hrang hret te awm mah se, a zavai hian heng hi tangka, dan hnuaia hlutna nei leh mi tinin an pawm tlan vek tur a ni.

“3. Mizoram chhunga India khua leh tui zawng zawng, mipui rawngbawltute leh tangka khawihtute, sumdawng, mimal leh pawl zawng zawngte, heng pawisa thir cheng sawm leh cheng sawmhnih te hi hnualsuatna nei hauh lo leh thliar hrang lova pawm thlap tura ngen leh hriattir an ni a. Danin pawisaa a pawm, lo dawng duh lo leh hemi kawnga mi dangte tana harsatna lo siamte chungah a ṭul ang zela dan kenkawh theih a ni.”