Chief Minister in Kolasib ah ICAR buatsaih Krishi Mela Cum State Level Farmers Workshop a hmanpui

#ZONEWS Kolasib December 11, 2025: Vawiin khan “ICAR Research Complex for NEH Region, Mizoram Centre, Kolasib in December ni 11-12, 2025 chhung awh Tribal Sub Plan (TSP) hnuaia ‘Krishi Mela cum State Farmers Workshop’ hawnna inkhawm a buatsaih chu Pu Lalduhoma, Mizoram Chief Minister chuan a hmanpui.

“Tlangram loneih dan thiamna (technology) tlo hmanga Mizoram loneitute tihchak- Strengthening Tribal Farmers of Mizoram through sustainable Hill Agriculture Technologies” tih thupui hmanga Krishi Mela cum State-Level Workshop neihah hian Khuallian, Pu Lalduhoma, Chief Minister chuan thu sawiin, Mizoramah hun rei tak chhung lo neih dan phung pangngai (jhum cultivation) kan lo hman tawh piahlamah , a tlo zawk leh science thiamna hmanga lo neih dan thar (sustainable, science-based farming) kalpui a tul thu a tarlang a. Chief Minister chuan a lo neih (jhum) chu Mizo hnam nunah thuk takin bet tlat mah se, leilung chereu zel leh sik leh sa inthlak danglam (climate change) avangin leh kan hmakhua a ngelngheh zawk nan technology changkang zawk hman a tul tawh a ni, a ti.

Chief Minister chuan Sorkar flagship programme ‘Banakaih- Handholding Scheme’ chungchang sawiin, hei hian eizawnna bul tan thar tumte hnenah loan hmangin tanpuina a pe a, loneih leh sumdawnna bul lo tan tawhte tan ‘ CM special package’ te siam sak an ni, a ti a. Aieng, hmarhcha,sawhthing,hmunphiah leh buh thar chhuahte hralhna man tha tak (price support) sorkarin a ngaihtuah sak thu a tarlang bawk.

Nikum khan sorkarin kuthnathawktuten hmunphiah (dry broomstick) an thar chhuah te a lei sak bakah, sawhthing thar chhuaktute tanpuinan cheng vaibelchhe 137 chuang a seng tawh a ni, a ti a. Thil chhinchhiah tlak tak tak tarlangin, NITI Aayog chuan Mizoram chu “Ginger Capital of India” tiin a puang (recognise )tih a sawi a, processing unit pawh hmun hrang hrangah din a ni , a ti.

Eizawnna tling thlai (cash crop) lamah pawh hma lakna nasa tak awmin, a bik takin Chief Minister’s Rubber Mission hnuaiah hma lak a ni a, a ti a. Kumin financial year chhung hian Rubber tiak nuai 11.58 chuang, hectare 2,575-a zauah phun tum a ni a, hmathlir (vision)thui zawk ah hectare 11,000-a zaua phun tum a ni, a ti. Kuhva (Arecanut) lamah pawh dan lova lak luh khauh taka ven a nih avangin a hralhna man a sang hle a ni, a ti a. Rengdil khuaah cheng nuai 1,000 chuang leh Hachhek bial kuhva chingtuten cheng nuai 5,000 chuang sum an la lut a ni, a ti. Kuhva chin lama hmasawnna a kal tluan zel theih nan Arecanut processing unit thar din mek a ni tiin, Buhchangphai-a mi pawh hawn mai theih tura peih a nih tawh thu a sawi.

Chief Minister chuan ICAR Mizoram Centre nena thawhhona tha tak an nei chu lawmawm a tih thu a sawi a, anni hian kan ram leilung mil technology leh thlai chi tha zawk, Siata Mimpui (buh) leh Mizo Popcorn-1 te an chhawpchhuak a ni, a ti a. He thawhhona kaltlang hian ran chi (indigenous livestock) te leh kan state sangha, Nghavang humhalh kawngah te leh kawng hrang hrangah hma lak ho a ni a ti.

Chief Minister chuan loneitute, ICAR scientist-te leh thalaite chu kan ram leilung nen inlaichinna tha zawk siama, Mizoram leilung chu eizawnna tlo leh hlawk zawk a chantir tur leh state intodelh din turin a sawm a ni.

Khual zahawm, Mizoram Legislative Assembly Deputy Speaker Pu Lalfamkima pawhin thu sawiin, ICAR chu research beihna leh training pekna hmun pawimawh tak, Kolasib district in a chhawr tangkai em em a ni, a ti a. Kuthnathawktuten an thiamna leh hmanrua te kan leilung mil tura an duan chhuah te chu thiam taka kan chhawr tangkai a tul a ni, a ti.Tunlai khawvel thang zelah lo hal a buh tuh mai duhtawk lova, ICAR kutchhuak khawl leh thiamna te hmang tangkai tura kuthnathawktute chah in, sawrkar chu kuthnathawktute tana ding tlat a ni , a ti a, sawrkar hmalakna kaltlangin hmasawnna tam tak hmuh theihin a awm mek a ni, a ti.

He hun hi pu Dr. S. Doley, Head of Regional Centre in a kaihruai a. Dr. K.M. Bujarbaruah, DDG (Animal Science) hlui leh AAU, Jorhat, Assam-a Vice-Chancellor hlui chuan Kisan Mela pawimawhna sawiin, kum 2047-ah chuan kuthnathawh leh a kaihhnawih (agriculture and allied sectors) te hi eng dinhmunah nge a din ang tih kan thlir thiam a tul thu a sawi a. India ramah kuthnathawh leh a kaihhnawih lamah nasa taka hmasawnna leh inthlak danglamna a awm tawh avangin khawvel pawhin India ram an thlir thup tawh a ni, a ti. North east bika kan tlakchhamnate phuhru turin theihtawp chhuah a ngai a ni a ti a. Ram pumin natural farming (chemical tel lova thlai chin) a ngaih pawimawh thu sawiin, Mizorama diversity hausa tak chu tangkai taka hman a pawimawh thu a tarlang bawk.

Dr. S. Hazarika, Director, ICAR Research Complex for NEH Region, Umiam, Barapani, Meghalaya chuan ICAR Mizoram Centre-in technology thar tam tak, a bik takin thlai chi hrang hrang te, hmun hma mila ran vulh leh thlai chin kawp (Integrated Farming Systems – IFS) te, leilung humhalh chunga kuthnathawh dan (conservation agriculture) te, tui khawlna hmun tenau zawk (small scale water harvesting structure) tihlar te a chherchhuak tih a tarlang a. Tribal Sub Plan (TSP) hnuaiah state chhung loneitu 20,000 chuangin hamthatna an dawng tawh a, social media platform hrang hrang hmanga sik leh sa mila kuthnathawh dan tur hrilhriatna (agro-advisory services) pek chhuah thin kaltlangin loneitu nuai 4 chuangin hamthatna an dawng tawh bawk a ni, a ti.

He hun hawnnaah hian Kolasib, Mamit leh Hailakandi district atangin loneitu 300 chuang an tel a. District chhunga loneitu hlawhtlingte hnenah hmanraw pawimawh tak tak – Lei lehna khawl (Power tillers), Ke a rah Aieng zai sawmna (Pedal-operated turmeric slicer), Hmarcha leh thil ro rawt sawmna (Spice Pulverizer), Pa (Mushroom) chi khawrna leh sawngbawlna (Straw spawn filling and compaction unit) te, ar note leh vawk note te sem a ni a, innovative farmers te hnenah chawimawina hlan a ni bawk. Khuallian hian lehkhabu pahnih leh ran vulhtute tana tangkai tur mobile app ‘Gau Bandhu’ a tlangzarh bawk a ni.

He workshop chhung hian Line department hrang hrang, FPO leh loneitu hlawhtling ten an thil thar chhuah pholan nan stall 25 an hawng bawk.

Chief Minister in a ICAR Krishi Mela Cum State Level Workshop a hmanpui na ah hian Pu Lalfamkima, Deputy Speaker, Pu Robert C. Lalhmangaiha, Deputy Commissioner, Kolasib, Pu Lalrinpuia Varte, Superintendent of Police, Dr. Anupam Mishra, Vice Chancellor, CAU Imphal, Dr. K.M. Bujarbaruah, former Vice Chancellor & DDG, Dr. S. Hazarika, Dr. B.P. Singh, Principal Secretary & Nodal Officer te leh ICAR a hotu dangte leh Kolasib a Sawrkar Department hotute leh loneitu thahnem tak an tel a ni.