Home Minister hovin “The Mizoram Firecrackers (Regulation and Control) Bill,2025” leh kumin krismas leh kumthar vuakveta Halpuah, Halmawi leh puakthei thil Prohibitory Order chungchangah meeting

#ZONEWS AIZAWL December 11, 2025: Vawiin khan Home Minister Pu K.Sapdanga hovin Secretariat Conference Hall-II, MINECO- ah kumin Krismas leh kumthar vuakveta halpuah, halmawi leh puakthei thil khapna thupek (Prohibitory order)  leh “The Mizoram Firecrackers (Regulation & Control) Bill, 2025” chungchangah meeting neih a ni.

Vawiin meeting-ah hian “The Mizoram Firecrackers (Regulation & Control) Bill, 2025” chu kumina hmang nghal tur chuan hun a tepter tawh si a. Nakum budget session-a regular bill anga putluh tha zawkin meeting chuan a hria a, chutiang tur chuan a rel a ni.

Vawiin meeting chuan kumin hi halpuah leh halmawi halin mihring leh ran laka nghawng tha lo a nei theihzia inzirtir uar kum “Year of Awareness Campaign on the harmful effects of Firecrackers” tan hman ni se, kum dang zawng aiin Awareness campaign uar ni se, tiin a rel. Kum danga lokal pui tawh thin angin, CYMA kaltlangin YMA member tin te hnenah, Kohhran tin kaltlangin an kohhran mi leh sa te hnenah, Central Para Military Force te, Central Police organization hrang hrangte hnenah, Mizoram Merchant Association (MIMA) leh online marketing agency te hnenah leh GAD kaltlangin Sawrkar hnathawk te hnenah  Khapna thupek zawm theuh tura ngenna siam leh ni se. Halpuah,halmawi leh puakthei thil lakluh, zawrh, lei leh hal khapna thupek te tha taka mipui mimirin an zawm theih nan CYMA, Local council, Magistrate leh Police te chu thawk dun leh se, tiin a rel bawk.

Vawiin meeting-ah hian Chief Secretary Pu Khilli Ram Meena IAS, DGP Pu Sharad Agarwal IPS, Home Secretary Pu Vanlalmawia Renthlei te pawh an tel a ni.