CHIEF MINISTER LEH COMMITTEE ON PUBLIC SECTOR UNDERTAKINGS TE AN INKAWM

#ZONEWS Aizawl August 11, 2025: Vawiin khan Committee on Public Sector Undertakings, Mizoram Legislative Assembly te chuan Chief Minister Pu Lalduhoma chu a office-ah an kawm a. Mizoram sorkar hnuaia Public Sector Undertakings palite chungchanga an thil hmuh te an sawipui.

Chief Minister chuan, Assembly Committee hrang hrangten Assembly-ah report kan thehlut thin a. Tuna kan Committee on PSU ten in report in thehluh hmaa in zirchianna behchhan in thil hmuh min rawn sawipui hmasa hi in bengvar ka ti a. Kalphung tha zawk tur rawtna in rawn neih ngei ka beisei. In recommendation te chu House-ah han thehlut thuai ula, a rang lama tihhlawhtlin kan duhin ka ring, tiin an rawtna pawm a harsat a rin loh thu a lo hrilh a. An thawhrimna fakin, lawmthu a lo hrilh bawk a ni.

Pu H. Ginzalal, Chairman, Committee on Public Sector Undertakings chuan ZOHANDCO, MIFCO, MAMCO leh ZIDCO te kalpui zel dan tur, Committee in an rawtna neih tlangpui a sawi a. State dangahte kan zin a, an kal dan kan zir a. Kan thil zirte atanga kan ram tana tha ber tur nia kan hriat report kan siam a, House-a thehluh thuai a ni ang, a ti.