HPO Policy Leh Unau Indona – JC Liana

Khuhhawnna: HPO kan tih mai hi Hualngoram People Organization an ni a, CDF Hualngoram chu HPO thiltum tihlawhtlingtu tur ralthuam keng an ni. Hualngo sipai tih te pawha sawi an ni. An policy leh thiltum lian ber chu Falam Township, Tedim Township leh Tonzang Township at’ang an ram nia an chhal, khaw 58 vel chu ralthuam chakna nena tharum hmanga hnuhkhawma, Hualngoram Township or District din a ni. Hetia mi tlemte leh ram bung tereuh tein ralthuam chakna hmanga ram an din an han tum ta mai chu hriatthiam a har I ti mai thei. Mahse Chin State-a sipai ding hmasa leh lian ber, Halkha sipai Chin National Army(CNA) nen an inkawp vang a ni. CNA leh ZRA an inkap kan tih fo hi, a nihna takah chuan CNF/CNA-in an fanaute a humhalhna a ni ber zawk awm e.

Policy dik neih hi a pawimawh em em a. Hitler-a policy avangin mi maktaduai tam tak an thih phah a, amah ngei pawhin a thih phah a, German ram pawh a chhiat phah a ni. Myanmar pawh sipai lalte policy vangin hetiang dinhmun kan thleng a. CNF policy dik lo, Chin State zavaiin kan ram a ni an tih avangin unau inkahna a chhuak chhen a nih hi! HPO policy t’henkhat hi chu en nawn an ngaih hmel hle. A bik takin barh luihnaa khaw tam tak kan rin luh chuan intualvuakna pawh a thleng thei bawk a. Tum ram thleng thei der si loin kan \halai tam tak thisen luang leh kumkhuaa inhmelmakna pawh a thleng thei bawk a ni. Tunah pawh CDF Hualngoram sipai te chu sual sipai kappa thi aiin unau kahnaa thi an ni deuh tlangpui a ni.

He policy avangin HPO din hmaa inhmangaih em em t’hin te kha inhuatna leh inbeihnain a luah khat zo ta a! Hualngo rama cheng an policy support lo tan phei chuan t’awng fimkhur a ngai em em a ni. Tonzang Township ram neitu Zomi Revolution Army (ZRA) nen chuan vawi tam an inkap tawh a. An la inkap zel rih tura ngaih a ni. Tunah Falam District aiawh pawl, Chin National Organization/ Chin National Defense Force(CNDF) nen pawh an inngur deuh reng a, HPO in an policy an tihdanglam loh chuan a tawp ah chuan an la inkap leh nge nge tura ngaih a ni. Chubakah Tedim leh Zomi hnam aiawha ngaih Zomi Federal Union/PDF Zoland nen pawh an la inkap leh ngei ang le!

Buaina Bul CNF/ CNA: Chin State chhunga innghirnghona leh buaina zawng zawng chu ‘CNF hem thlak vek a ni’ ti ila kan sawi sual awm lo ve. CNF hi Falam Township, Lianduh khaw lal fapa Pu T’ial Khal-an 1988 kuma a lo din a ni a. Falam bial Ngailan khaw mi Pu No Than Kap-an President a thawh tirh 1989 khan Chin National Army a lo din bawk a ni.

Chin State chu t’awng hrang hrang, chi hrang hrangah chenhona a nih avangin, chung hun lai chuan a rual thei ang berin mawhphurhna inpek a ni a. Mahse 1992 kum khan tuna CNF President thawk mek Pu Zing Cung-a hovin, mi t’henkhat an ru bo(abducted) va, khatih laia President Pu No Than Kap-a chu bang turin an phut a, a bang ta bawk a ni. Chumi at’ang chuan chi hrang hrang leh hnam hrang hrang te chu an bang ta sap sap mai a. Chumi ni at’ang chuan CNF chu Halka(Lai) ta ah a lo chang ta a si. Tunah pawh CNF hruaitute zingah mi dang pahnih khat tel ve bawk mahse, thutlukna siamtu leh a lulawk zawng zawng chu Halkha leh Thlantlang biala Lai deuh vek an ni. Hemi avang hian US ah pawh Lai an tam ber a, an t’ang em em bawk a ni. Hei vang tak hian alawm, Lawngtlai Lai District leh Young Lai Association te pawhin CNF sawi ang apianga Mara le Rakhine chunga kut an thlak ziahna chhan chu!

1992 at’ang 2021 thleng Chin State-a ralthuam keng awm chhun CNA an ni a.(ZRA East Command hi CNA kut at’ang an mite hum turin 1996 khan an ding ve a ni). Khang hunah te khan CNA kut tuar an tam em em a. Falam rep char tumin Rih kawng an khar a, Tonzang bial Saizang khuaah mi tamtak thah an ni a, khaw lal telin mi tamtak kut an thlak a ni. 1996 khan Pu No Than Kap-a pawh Aizawla a chenna inah kahhlum tumin an kap a, mahse a thi lo hlauh a ni.

2021 Sipai Thuneihna Pawnglak leh Buaina: 2021 February 1 khan Myanmar Army chuan thuneihna a pawnglak a, chu chu mipuiin an duh loh avangin an dodal nasa mai a. Tawkfang a\ang sipaiin mipui chunga tharum a lekkawh avangin mi tam tak ram hnuaiah kalin ralthuam nena sipai dolet an tum ta a ni. Mi tam tak chu KNU hnenah te, KIA hnenah te kalin raldo thiamna an va zir a, an lo let lehah an mite an zirtir chhawng leh ta \hin a ni. Chin State ah Chin Defense Force-Mindat a ding hmasa ber a, chumi hnu ah CNA kaihhruaina in Chinland Defense Force hmun tinah din a ni a. Chu chu Kawl hoin an hriatin People Defense Force an din ve ta chiam a ni.

CNO/CNDF Chu Tute Nge Ni: CNO huaihawttute hi Sipai dodala nasa taka chechang te an ni a. Chutia sipaiin silai nena mipui an kah takah chuan ralthuam nena dodal turin Falam District huap t’halaite chu kokhawmin April 13, 2021 khan Chin National Organization/Chin National Defense Force din a ni. Hetah hian Falam bial chhunga hnam 12 an tel vek a ni. An din tawkfang at’ang Falam bial chhungah ralthuam keng pawl thar din phal a ni lo tih thuchhuah an siam nghal bawk a ni. Hei hi hnam bil, chi bil tinten silai an ken t’heuh chuan inkahna leh thisen inchhuahna a la chhuak ngei ang tih an hriatsa vang a ni.

CNF t’anpuinain HPO an Ding Lui: CNF hi 2012 khan Myanmar sorkar nen an inbia a, Nationwide Ceasefire Agreement an singed ve avangin sual sipai do an duh lo lawk a. Mahse t’halai ten an ngen nasat em avangin Military Training chu an lo pe hram a. Chuti chuan CDF a lo ding sap sap a. Halkha leh Thlantlang bial ah te pawh hnam bil ralthuam keng pawl thar an ding ve a, mahse CNF kut hnuaiah an awm a. Tedim leh Tonzang ah pawh ZRA ten pawl thar din an khap na chungin CNF t’anpuina in pawl 4 an ding a, PDF Zoland tih loh chu CNF/A thawhpui vek an ni a.CNF in ZRA a kahna ah pawh an tel vek a ni.

Hetih lai hian Falam, Mindat leh Kanpalet bialah te chuan ralthuam keng pawl khat chauh an awm a. Chu chu CNF tan chuan mitmim ang hlauh a ni a. Sawh keh dan tur leh pawl thar din dan tur ringawt an ngaihtuah \an ta a ni.

CNF hian Falam bialah hian Halkha ramri hrula awm, Halkha t’awng hman pawlh Hlawnceu hnam chu kherin CDF-Hlawnceu an din a. Mahse hei hi thil t’halo a nih avangin Global Hlawnce hruaitute an inhmu khawm thuai a, pawl dang din lo turin an rel ta a ni.

Hemi hnu hian CDF ngawn leh CDF Khualsim din tumin an bei leh a, an hlawhtling ta chuang lo a ni. Hualngo mi tamtak chu CNO/CNDF ah an tel a. Ram tana nun hlan Drone lam mithiam Pu Sap Din T’huama pawh Hualngo hruaitu pakhat a ni nghe nghe a ni. Hun a lo kal zel a, Hualngo t’henkhat ten CDF-Hualngo din turin t’an an la a, hei hi CNF tan hun remchang tak a ni a. Tichuan Falam bialah ralthuam keng pawl thar din lo tur leh ralthuam keng pawl dang awm lo tura CNDF policy chu CNF chakna hmangin an palzut ta a ni. Kawng leh lamah chuan CNF in Falam phel darha tih chak loh a tum chu HPO/CDF-Hualngoram hmangin a hlawhtling ta a ni.

CNF leh Kawl sorkar an inbiak dawn khan 1990 MP Elect Dr. Za Hlei Thang-a(Zangiat) chu CNF Chairman atan rei lote ruat a ni a. Chutah chuan Zangiat t’halai 7 vel CNA ah an lo lut a. Chumi hmang chuan Zangiat People Organization/CDF Zangiatram an din ta a ni. Chubakah CNA-a Ngawn mi 4 vel hmangin CDF-Ngawn din an tum bawk a. CNDF hian CDF-Hualngoram vanga an buaizia hriain CDF-Zangiatram leh CDF –Ngawn chu Falam bial chhunga Camp neih an phalsak lo a ni.

Hetianga Falam bial pheldarh nan hian CNF leh Halkha lam unau te chuan Fundraising an nei nasa hle a. ZPO din theihna nan an fundraising platform Vaurawng Zuunthil-a an au bakah Chin Baptist Church USA pawhin nuai za tam a t’anpui bawk a ni.

US ah hian Chinmi zingah Halkha(Lai) hi an tam ber a, 40000 vel awma ngaih an ni a. An phurna a sosang a, an chak em em bawk a ni. Mahse hetianga sum leh pai cheleka bawlhhlawh taka kohhran a chet hi Pathian in rem a ti lo pawh a ni mahna, CNF tana an sum thawhkhawm, US Dollar maktaduai 12 chu CBC USA hruaitute chuan an ti chingpen ta a. Hei hi 2023-2024 chho khan a ni awm e. Hemi hnu hian US Lai/Halkha Community pawh an beidawng ta em em a. Tun hma ang chuan sum an hmu hlei thei tawh bik lo a ni. An sum hmuh chhun te pawh ralthuam lei nan hmang loin an Chinland Council leh CNF hruaitute hlawh tam lutuk ah te, Chinland Government siam nan te, University dinna atan te an hman zawh t’hin avangin SAC sual sipai an do hleithei tawh lo a ni. An do chhun te pawh an mipui sipai ten silaimu an tlakchham \hin avangin hmelma an hneh thei tawh lova, unaute ram pheldarh a awp beh tumin hmun tinah buaina an siam ta t’hin zawk a ni. (2024 Tilim Operation 4 hminga Thlantlang an bei t’umah pawh CC in silaimu a pek loh thu leh silaimu 30000 chauh an neih vanga an lak theih loh thu CDF Thantlang GS chuan a sawi a ni)

CNDF leh CDF-Hualngoram Buaina: CDF-Hualngoram policy hi Falam District chhunga Hualngo chi bil awmna khuate tharum hmanga lak khawma Hualngoram din a nih tlat avangin buaina chu a chhuak lo thei lo a ni.

Mizoram mipuite hriatthiam dan tur chuan Champhai District chhunga Hualngo khaw 11 te khian Mara sipai emaw, Aizawl district chakna rinchhanin ram bung hrang din tumin, Champhai District hruaitute leh champhai sipai te chu dodalin, chu an rama an chhalah kaltlang phal lo ta se buaina a chhuak ngei ang. Chutiang chiah chu a ni e.

Heti pawhin sawi ila. India ram bung pakhat Assam chuan China rinchhanin an ramri huam chhungah India PM leh President kal phal lo miah lo se, India sipai pawh, ‘in lo luh chuan kan kap ang che u’ ti bur sela buaina leh inkahna a chhuak em em ang.

HPO hruaituten an sawi t’hin chu Sap(British) lo kal hmaa thu a ni a. Chung hun thu chu tuma pawm theih a ni tawh lo. Tin chung hun laiah pawh Falam lal Pu Con Bik-a hnena chhiah an pek vangin an ramah an ngai a. Mahse chung hunah pawh Falam(Tlaisun) lal Pu Con Bika phalnaa khua din chauh an ni tih kha hria sehla a \ha ngawt ang.

CNDF te chuan, “Engpawh nise Revolution lai hi chuan heti hian I awmho ang u. Hualngo ram bung hran in din duh a nih pawhin Revolution zawh hnu ah kan sawiho ang a, mipuiin t’ha an tih tlan chuan thil theih lo a awm hlei nem” an ti lawm lawm t’hin a. Mahse CNF in an mawng an hawlh tlat avangin CDF Hualngoram hruaitute chuan indo an cho em em a ni.

Chin State Politics Hmun 2 ah: Chin State sorkarna vawng turin CNF kaihhruainain CNF, MP elect, CDM-er te leh civil society hmangin Interim Chin National Consultative Council(ICNCC) din a ni a. Mahse MP an tel avangin CNF in an duhdanin an bawlkual thei lo va. Chu bakah chibil ralthuam keng an t’anpui ho te nen pawl tam zawk an nei tih an inhriat ve leh ICNCC at’angin an chhuak a, an t’huih hruaite nen 2023 September thla khan Chinland Council an din ta a ni. Justice leh intluktlanna a awm loh avangin Township level pawl lian te chuan an zui thei lova, 2023 December 30 khan Chin Brotherhood an din ve ta a ni.

Hetah hian CNF ten an hawlh phel a, sum leh ralthuam nen an t’anpui tak, pawl tenau te chuan Chinland Council an zui ta a ni. Chutin CNDF chu Chin Brotherhood ah an awm a, CDF-Hualngoram te chuan Chinland Council an zawm ve thung a ni. Tunah chuan Mizoram unaute t’anpuina in CB leh CC te chu an inbia a, Chin National Council tiin pawl khata luangza turin ke an pen mek a ni. Mahse CNF ten an mizia an sim loh chuan luanza ahnekin inkahna nasa tak a chhuak thei tho a ni!

On Ground-a Buaina: CDF-Hualngoram te hian an din tirh khan CNDF hnenah Falam District chhunga awmtir turin mit tui nen an dil tak meuh a nih kha. A tawp ah chuan CNDF in an phalsak ta a. Mahse CDF Hualngoram chuan thla hnih vawi khat CNDF hnenah report a pe ziah tur a ni a, an kawng kal an ti buai tur a ni lo. Mahse hun a lo kal zel a, Ground ah neuh neuh a tam avangin inbiakna an nei a, ralthuam nena gate kal tlang dawnin in hriattir ni se tih a ni. Mahse tawkfang at’angin CDF Hualngoram te chuan CNO hruaitute leh CNDF kalvel chu an tibuai ta t’hin a ni.

CNDF Brigade hotu Pu Lian No an man lawk a, CNO hnuaia sikul tawlreltu Pu Nang-a chu an vuak hrep hnuah thla 6 lai CNF Camp Victoria ah an hreng a, CNO Vice President Pu Bawi-a pawh |iau Khawmawia a chaw ei lai an hnawtchhuak bawk a ni. Rih leh |iau vela CNO supporter nia an hriat te in chu an check thut thut a, an rikrap deuh reng bawk a. An gate ah CNO T-Shirt an hmuh vang mai pawhin khualzin mi an tibuai t’hin bawk a ni. An hruaitute chuan CNA rinchhanin Online ah CNDF vauna leh chona an chhakchhuak reng bawk. Tun hnai maiah pawh khan CNO hruaituten Falam lak lawmthusawina nei tura an kal chu Kawtsei gate ah an lo tih buai avangin an let leh ta a ni. Heng thilte hian innghirnghona a ti sang duh hle a ni.

CNDF leh CDF-Hualngoram Te Hi Lo Inkap Ta Se: CDF-Hualngoram Defense Director Pu Lal\anpuia(Puitea)-a chuan inkah a chak zek zek thu te, civil war thleng se tih chu a t’awngt’aina a nih thu te, kan vela CB te eng vangnge kan kah loh, tih te Halkha media online ah au chhuak fo va. HPO GS Pu Zawma chu tlemin a \awngkam a fing deuh va , ani chuan, “In huat thu kan lo sawi a, min velh bak deuh a nih pawhin mi vel lo hram teh u, min tih palh chuan kan u CNA kan pun dawn si a, buaina a lian mai mai” tiin CNA a rinchhanzia chu a thup lem lo a ni.(Zofa Journal)

CNO GS Salai Thawng Thawng-a ve thung chuan Chin Net interview ah, “Civil war chhuak lova inremna awm thei hram se tih chu kan t’awngt’aina a ni” a ti ve thung a ni. Chu bakah Sual sipai kan do mek laia unau inkah rik ngawt hian rah t’ha a chhuah loh bakah sual sipai lawm zawng a ni a, tihdam theih tawh loh pan ser a awm hlen tawh dawn a ni a ti bawk. A sawi chhunzawmna ah chuan, “Mihring dawh theihnain a tlin tawh lova kan inkap a nih chuan CDF-Hualngoram chauh ni lovin an hnunga awm “kut dum”(black hand behind the scene-CNA) pawhin a tuar ang” tiin CNA pawh vauin an hlau chhete lo tih a langtir bawk a ni. CNO AGS leh Spokesperson Salai Timmy pawhin CDF-Hualngoram chungchangah heti hian a sawi ve a, “Inrem kan duh. I inrem ang u, I inbia ang u. In sawi angin indo tak tak ila Hualngo ram in tih chu ral ramah a chang a, awm theih a ni lo vang. Tin CNA in pun chuan CB kan tel ve ang a, Chin State chu indonain a khat ang” tiin Chin Net ah a sawi ve bawk. Salai Timmy hi CB Defense Committee Secretary thawk mek a ni bawk.

CNO Vice President 1 Salai Peter Thang pawhin, “’Khawngaih takin min awmtir rawh u, kan awm ve tih min pawm rawh u’ tiin mittui nen min dil a. Kan awmtir ta cheng a, CNA rinchhanin kan kal vel pawh an phal tawh ta lo a ni” tiin a sawi ve bawk a ni.

CNDF leh CDF-Hualngoram buai hi CNF duhthusam a ni a. An buai chuan Falam ah mahni leh mahni an inkap tiin an salawm a tla dawn a ni. Inkahna a chhuah chuan Hualngo tlangltuan tan chhiatna nasa tak a chhuak dawn a ni. Tu pawhin lo hneh sela mi tam tak an thi ang a, khaw tam tak a \iau vek dawn a ni. Hualngo rama an chhal huam chhung mipui te pawh an raltlan vek dawn a ni. CDF Hualngoram a tlawm phei chuan Victoria Camp lama a insawn a ngai tawh bawk dawn a ni.

CNDF leh CDF Hualngoram Chakna Khaihkhinna: Indona hi hneh zawk tur sawi theih mai a ni lo va, mahse an strength leh ralthuam chu khaihkhin theih a ni. A chhung thu hre tute rindan hi I lo thlir ang:

Mipui: CNDF 100000, CDFH 10000

Sipai: CNDF 1000+, CDFH 100+

Auto silai: CNDF 800, CDFH 60 (CNDF hian 120mm, 80mm, 60mm, 40mm leh RPG pawh tawkfang an nei a ni)

Reserved: CNDF 500, CDFH 500

Training: CNDF an nei t’ha zawk

Experience: CNDF an nei t’ha zawk

Alliance: ​CNDF: CB, AA, BPLA, NLA, KRF, BRNA, +

​​CDFH: CC

CB leh CC Khaikhinna: Chinland Council ah hian pawl 20 dawn lai an tel a, mahse CNA leh CDF Hakha tih loh chu pawl lian an awm lo a ni. Chin Brotherhood ah hian pawl 6 chauh an awm a, mahse CDF Mindat leh CNDF te chu CNA nen intluk thuaka ngaih an ni. Chu bakah PDF Zoland leh Maraland Defense Force chu lian ve tak an ni. Am experience v eve thlir in CC hian khawpui lian leh Battalion Headquarters chin camp lian a la la lo va, CB chuan Tactical Command telin camp lian 4, khawpui lian 4 a la tawh bawk a ni. 2023 thleng kha chuan CB aiin CC an lianin an chak zawk daih a, mahse tunah chuan CB an chak zawk tura ngaih a ni. Hei hi CC Supporter hruaitute pawhin online sum zawnnaah an sawi chhuak fo a ni.

2024-25 chhung khan CC lamin silai 300 vel chauh an neih belh laiin CB lam chuan 120mm Howitzer 4 telin, laipui tam tak nen silai 1900 vel an neih belh a ni. Silai 1900 zinga 1450 chu hmelma ta an chhuhsak a ni a, 450 vel chu an lei belh a ni. 2023 hma kha chuan CNF chauhin silai an lei thei a, 2024 a\angin CB lamin AA hnen a\ang silai man tlawm zawkin an lei thei ve ta a ni. Hei vang hian alawm CC in AA chu dawt tinreng puhin hmelma ang hiala an sawi \hin chu ni.

Supporting Township : CB 6 (Tedim, Tonzang, Falam, Mindat, Kanpalet, Matupi half) CC 2 (Hakha, Thantlang, Matupi half, Paletwa half)

Sipai :CB 3000+ (Mindat 1000, CNDF 1000, Zoland 600, Mara 300, Kanpalet 250, Matupi 250) CC 2800 (CNA 1100, Hakha 400, KKG 200, Thantlang 150, Tonzang 120, Paletwa 100, Hualngoram 100, Senthang 100, Zotung 100, Zophei 100, Lautu 80, CDM siyin 80, PDA 50, Zangiatram 30, Mara 30, Mindat Council 10, Kanpalet Council 10)

Ralthuam: CB in CC neih lo Howitzer 3, 0.5 thlawhna kahna 2 , laipui engemwa zat leh HMG \hahnem tak an nei.

Training: CB sipai sang chuang cu AA hnenah training t’ha tak la an ni a, CC zingah CNA sipai t’hahnem tak chu KIA hnena training nei an ni ve bawk.

CC leh CB te hi remna sawi hlawhtling loin lo inkap ta se, Chin State chu boruak chhiain a khat dawn tihna a ni.

HPO in Hualngorama an Chhalah Tute Nge Cheng: HPO in Hualngoram-a a ngaih khaw 58 zinga khaw 30 chuang te chu Hualngo tlem zawkna emaw, Hualngo awm lohna emaw, Hualngo ni lo hnam dang din emaw a ni a. Hualngo tam zawkna khua ah pawh Hualngo lo eng emaw zat an awm vek bawk a ni. Township-a rin luh dawn chuan, khuaa cheng mipui tam zawk te duhdan lak thin a nih kha kan hre theuh awm e.

Falam biala Zawlte, Tibual, Bualte, Tilum, Laizawl, Palte, O. Hmawngkawn, N. Hmawngkawn, Khawthlir, Phunte, Ticirh, Lianhna le Rihkhawdar te chu Hualngo khua an ni lova. Hualngo khaw sah Tlangzawl, Khiangzang leh Leilet ah te pawh Hualngo an awm tawh mang lo bawk.

Tedim leh Tonzang bialah pawh Dampi, Tuisenzang, Fartlang,..etc te chu Hualngo khua a ni lo va. Hualngo khaw sah an tih Chauleng, Bapui, Darkhai, Bukphir, Kawilam, Vutbuak le Old Haimual ah te pawh Hualngo an awm mang tawh lo a ni. Hei bak khaw dangah pawh Chinmi chitin in awmpawlh nuk kan nih avangin chibil hminga ram din tum hi chu buaina a chhuak thuai dawn tih chu a chiang sa a ni. Hualngohoin an khawpuia an chhal Rihkhawdar ah pawh Hualngo aiin Laimi leh Zomi an tam zawk bawk a ni.

HPO/CDF Hualngoram hi CNDF te, PDF Zoland te, ZRA te nen lo buai lo pawh ni se, mipui buaina, inphekvuakna hi chu a thleng dawn hrimhrim a ni. Tun ang hun, kum zabi 21 ah ralthuam rinchhana ram din hi a hun tawh lo a ni. Thisen a luang ngei dawn!

Hualngoram Din Hi CNDF leh PDF Zoland an Dodal Em? Rihkhawdar khawpuia siama District emaw Township din emaw hi CNO leh ZFU lamin an dodal loh thu vawi tam an sawi a. Mahse Revolution zawhah sawihona at’ang t’ha tetea thil tih ni se an ti mai zawk a ni. Tuna HPO chetdan “Mahni nupui neih tur tute emaw fuihpawrhna avanga a hun hmaa chemte leka pawngsual tum ang lek a ni” A atthlak teh e. |henawm pa, a chak zawka hriat vang ngawta, t’henawm pa rinchhana mahni pa dodal hi chu a fin thlak lem lo vang.

HPO Thiltum Hi A Hlawhtling Ang Em: CNF rinchhana tharum hmanga Hualngoram din tum hi chu a hlawhtlin hmel loh a ni. A chhan chu CNF ang thuaka chak CNDF leh PDF Zoland bakah ZRA an hmachhawn a ngai dawn a ni. Politics zawng pawhin a hlawhtlin a rin awm chuang lo. A chhan chu a biakt’hat tur ber Falam, Tedim leh Tonzang te chu biak t’hat ahnekin ralthuam hmanga an dodal vang a ni.

Tuna HPO kaldan thlirin hruaitute chu National Politics te, State level politics leh tun hma hun thlir thiam lo an nih hmel a. Hualngo pafing Pu Kam Lian Buaia te, Pu Lian Chia te, Pu Do |hawnga te chu la dam sela chu he Policy chu an thlawp a rinawm lo a ni.

HPO Hnena Thurawn: HPO in Hualngoram bung hrang hrang chu ram bung khata siam in duh a nih chuan Falam, Tedim leh Tonzang nen inremna siam vat rawh u. Abik takin CNO leh ZFU hruaitute chu bawng talhin chaw ei te sawm ula, zupui inpui vat rawh u. Rih leh |io vela an lo kal pawhin, “Min zah lo ve, kan ram min nawr e, chu e, kha e, ek e” ti loin chaw te lo eipui ula, thingpui te lo khilai rawh u, tichuan in hmakhua a eng ang. Chuti ni lova in lo dodal ziah chuan nakinah dawhkan chunga politics in sawiho hunah pawh Township 2 ai chuan township 6 vote chu a tam zawk tih kha hre reng ang che u. Falam leh Tedim malsawmna tel loin Hualngoram chu in din chatuan lo vang e.

#zonews #article #zofate

Article te hi Zonews ngaihdan a ni vek kher lo.