CNO/CNDF-ten an man Military council sipaite hman tangkai an tum

#ZONEWS July 23, 2025:
Chin State hmar lam, Falam township-a Hualngorama Chin mipui sipai ve vete inbeihnaa CNO/CNDF-ten Military council sipaite an mante chu, zalen taka awm phalna an remtih angin inbeihnaah hman an tum thu hriat a ni.

July ni 22 khan, Chin State- news VOC-a interview-naah CNF/CNA thu puangtu Salai Thet Ni chuan a sawi.

“Thil lungchhiatthlak ber chu Falam khaw lak boruak atang khan a rinawm. Military council sipai an mante an hman thu hi a ni a. Hei hi Geneva convention dan nen a inmil lo va, hetia an tih hi mihring pakhat dikna chanvo zah lohna a ni. Kan zawhnaah chuan, Rihkhawdar khua kan lak hnuah in duhna hmunah kan chhuah zalen ang che u tiin an tiam thu, kan sipai mante hnen atanga hriat a ni. Hetian tho hian Military council-te pawhin an hmang ve a ni,” tiin Salai Thet Ni chuan a sawi.

Heng bakah hian India, Manipur State-a Kuki ralthuam keng pawl pakhat pawh CNO/CNDF-ten Chin unau ve vete inbeihnaah an hman bakah Kumi ralthuam keng pawla mi 3 an man thu Salai Thet Ni chuan a sawi bawk a ni.

“An beih dan kalhmang hi CNDF chauh ni lovin Manipur lama Kuki mite pawh an tel a, keini pawhin mi 3 kan kawl a ni,” tiin Salai Thet Ni chuan a sawi.

Chin unau ve vete inbeihnaah CNO/CNDF-ten an sipai mante an hman chungchangah CNO/CNDF thuneitute biak ni mah se, eng mah chhanna a awm lo a ni.

Chin State hmar lam, Falam township, Hualngoramah CNO/CNDF leh HPO/Hualngoramte chu July ni 2 khan an inbei tan a, July ni 5 khan CDF-Hualngoramte thunun mek, Indo-Myanmar ramri Rihkhawdar khua chu, CNO/CNDF-ten an thunun a ni.
Chumi hnuah CNF/CNA-ten CNO/CNDF-te sipai hmun pui an laksak leh thu hriat a ni.

July ni 11 khan, CNO/CNDF-te chu Rihkhawdar khua an chhuahsan leh a, Chin unau ve vete inkara inbeihna boruak pawh a dai deuh a ni. Tun dinhmunah hian CNA leh CDF-Hualngoramten an thunun leh mek a, tualchhung mipuite pawhin an luah leh tawh thu hriat a ni.

HPO/CDF-Hualngoram-te thunun mek, Hualngorama Rihkhawdar khua, Indo-Myanmar ramri No.2 hi sumdawnna hmun pui a ni a, CNF/CNA Brigade 4-te inkulhna hmun a ni bawk.

Source: Tahan Post