HIGH LEVEL TASK FORCE ON INFRASTRUCTURE & CONNECTIVITY TE THUKHAWM

#ZONEWS Aizawl December 3, 2025: Vawiin khan Ministry of DONER hnuaia din High Level Task Force on Infrastructure & Connectivity in NE Region te chuan online meeting an nei a. Chief Minister Pu Lalduhoma chuan a office atangin he meeting hi a zawm a. Chief Secretary Pu Khilli Ram Meena leh Pu Vanlaldina Fanai, Commissioner & Secretary to CM leh official pawimawh dangten an tawiawm.

Task Force convener Pu Manik Saha, Chief Minister, Tripura chuan state hrang hrangten Infrastructure leh Connectivity lama hmalakna tur an a thehluh report a pe a, chumi hnuah member-ten an rawtnate sawifiahna an nei leh a ni.

Chief Minister Pu Lalduhoma chuan, Mizoram road density chu India rama a hniam ber a nih avangin kawngpui tam zawk mamawhna a nasat thu a sawi a. Hmarchhak tana boruaka (Air) lama inkalpawhna tam zawk leh Airport tam zawk a tulna te, Inland Water Ways tha neih a tulna te, Rel leh Highways inthlunzawm tha leh a awmsate tangkai zawka hman theih tura siam (better interconnected) chungchang te, Internet connection tha, ramri khuate thlenga thlunzawm a tulziate a tarlang a ni.

Pu Jyotiraditya Scindia, DoNER Minister pawhin he meeting hi a telpui a ni.

December thla tawp lamah hian meeting an nei leh ang a, chutah chuan final report  an siam tawh dawn a ni.