ENGPAWH NISE LALPA REMRUATAH PAWM THEI ZEL ILA. – Ruata Sailo

#ZONEWS #MIMAL_NGAIHDAN August 02, 2025:
Kan CM Pu Duhoma pawh hi lalpa hriakthih zawng a ni ngei ang tih ka pawm ve tho. Kan ram hi tuma la luah ngai lohna ramah lalpan min hruai lut ah ngai ve mai ila, kan duthusam a ni lo mai thei, mahsela kan tan hian a tha zawkah ngai leh mai bawk ila. “In va luah tur ram chu tlang leh ruam leh van ruahtui dawng ram a ni si a, chu chu Lalpa zawn chhuah a ni” (Deut 11:11-12). Kan ram a la awm ngai lo thei leh thlai te pawh an that duh em hi tiin lawm takin i pawm mai ang u. A ram chhunga chengte’n lalpa lam kan hawi that duh loh chuan, roreltu tha lo deuhte min pein ringlomite hmuhsitin kan awm mai dawn a ni zawk.

Kan pi leh pute chu ni leh thla kara leng tia lo inchhal ngat, tu hnuai maha la awm ngai lo, sap ho hnuaia kun ai chuan lo do let mai thlang zawk an ni. British awp ram tamtak mahnia independence-a an awm khan kei ni erawh kan awm thei ta rih lo pawh kha, dilloh zawk malsawmna zelah a hriat ve tho mai. 1935 kuma Excluded Area-a puan kan nih kha a lawmawm a, India rama chanchin tha awlsam zawka kan hrilh theihna tura Lalpa remruat zawk pawh a nih hmel e.

Independence te kha lo sual lo law law ila chuan, tuna Martar Thlanmual te hi a awm lo mai tur hi a nia. Rambuai vanga lehkha zirzawm thei lo an awm lo bawk tur a nia, khawkhawm hlate pawh hi a awm lo anga ramin hreawm rapthlak lutuk kan lo tawrh tawh zawng zawng pawh pumpelh an ni ngei ang.

Ni 05.09.1986-ah House-a Chakma District Council buk a nih lai khan Congress leh MNF te khan thiah duh lo lamah khan lo vote lo hlauh sela tha tur a nia. PC Party MLA 8-te chauh khan thiah duh lamah vote an pe kha a nia, hei hi a pawi kan ti dawn nge a lawmawm kan ti zawk dawn?

Pu Churchill-a te leh Bawrhsap MacDonald-a ten dinhmun sang taka min dah duhin Crown Colony hial min kawhhmuh pawh a lawmawm hle. Mahse a hun laia tih theih harsa pawha lang lo, mahse, a theih loh tlat mai te kha Lalpa remruat a lo ni zel mai zawk ah a ngaih theih. Chunglam hian khawvel zau zawka chanchin tha hril thei tura min buatsaihna ah kan ngai thei mai em tih ngaihtuah chungin he video hi lo ngaihthlak zawm ila.