Excise & LESDE Minister Pu Lalnghinglova Hmar in OKM Home a tlawh

#ZONEWS Aizawl August 21, 2025: Vawiin chawhnu dar 2:00 khan Pu Lalnghinglova Hmar, Minister of State, Excise & Narcotics; Labour, Employment, Skill Development & Entrepreneurship (LESDE) Department chuan Operation Kingdom Ministry (OKM) Home, Phunchawng a tlawh.

Excise Minister Pu Lalnghinglova Hmar chuan thalai hna thawk rual engemawzat, ruihhlo vanga inkhungkhawm ngai chu pawi a tih thu a sawi a. “Chutihrualin home-a lutte hi in hneh loh hria a, in nihna zahpui lova huaisen taka lut in ni a. Huaisen takin a bul in tan ta sa sa, hlawhtling turin a tawp thleng ngei ang che u.” tiin a chah a ni. Excise & Narcotics Department in ruihhlo do kawngah nasa takin hma a la mek tih a tarlang bawk.

LESDE Minister ni bawk Pu Lalnghinglova Hmar chuan OKM Home-a thawktu leh ‘zirlai’ te chu Home-a an awm chhungin insak leh a kaihhnawihah an thawk thin a, chuvangin LESDE Department in Home-a Mizoram Building & Other Construction Workers Welfare Board (MBOCWWB) registration campaign a neih hunah member ni tura inziaklut theuh turin a chah. MBOCWWB member te tan skill development kalpui tum a nih thu leh, OKM Home-a member te pawh an tel theih tur thu a sawi bawk.

Sawrkarin thalaite hmakhua a ngaihtuah a, department hrang hrang, a bikin skill development kaihhnawihah thawhho dan ngaihtuah zel a nih tur thu a sawi.

Minister chuan OKM Home-a awmte hna thawh nan Cement mixer a pe a, sports bungrua leh pawisa fai Rs. 30,000/- a hlan bawk a ni.

OKM Home Founder Pi Lalruatpuii’n home inrelbawl dan tlangpui report a pe a. Tun dinhmunah mi 430 an awm a, Tuikhuahtlang Presbyterian hmeichhiain kumin March atangin thlakhatah Rs. 5000 an pek leh, Vaivakawn chawhmeh zuarte’n Inrinni ah chawhmeh an pek thin bak chu rinna in an kal tih a sawi a ni.

OKM Home-ah hian luh man leh awm man a awm lo a. Lut thar tan thla sarih course siam niin, course zawh hnuah a duh tan rawngbawltuah a inpek theih a ni. Lut nawn tan thla 9 – 11 course siam a ni bawk.

Excise Minister in OKM Home a tlawhna programme hi Rev. K. Lalpiangthara, OKM Adviser in a kaihruai a. Minister hi LESDE Director Pu John Tanpuia, Excise Commissioner Pu Z. Lalhmangaiha leh department officer dangte’n an tawiawm a ni.