RASHTRIYA POSHAN MAAH 2025 LAWMNA HUN HMANG

#ZONEWS Aizawl October 15, 2025 : Vawiin khan Directorate of AYUSH, Health and Family Welfare Department bultumin Dawrpui Multipurpose Centre-ah Rashtriya Poshan Maah 2025 lawmna neih a ni a. He hunah hian Dr. Lalthlengliani , Principal Director, Health and Family Welfare Department leh Director, AYUSH, Directorate of AYUSH ni bawk chu Khuallian a ni a. Pi Zoramthangi Chhangte, Director, Directorate of Women and Child Development chu khualzahawm a ni.

Rashtriya Poshan Maah (Nutrition Month) hi kum 2018-a Prime Minister-in Ministry of Women and Child Development hnuaia alo tan tawh Poshan Abhiyan (Nutrition Mission) hnuaia hman thin a ni a. Ministry of AYUSH leh Ministry of Women and Child Development-te’n thawhhona thuthlung an ziah atangin heng Ministry pahnih te tangkawp hian chawtha chungchang mai ni lovin, mipui hrisel, ram hrisel zawk kan nih theih nana ei leh in tha leh nunphung dik pawimawhna a zirtir nasa hle a ni.

Khuallian Dr. Lalthlengliani chuan thu sawiin, taksa thau lutuk hi tun hma lam chuan mi hausa zawkte natna anga ngaih thin a ni a, mahse tunah chuan mi nawlpuiah a tam ta hle a ti a. Thau lutuk hian natna hrang hrang – zunthlum, BP sang, lung natna, stroke leh cancer chi hrang hrang a thlen theih avangin hriselna ti derthawngtu lian tak a nih thu a sawi a. Awlsam taka inven theih a nih thu tarlangin ei leh in lama duhthlanna dik leh hrisel nei turin kalkhawmte a fuih bawk a ni.

Kumin thupuiah “Thau lutuk tura inven nana thlum, al, leh hriak ei tlem’ tih hman a ni a. Tunlaia hriselna lama kan buaipui lian ber zinga mi, natna inkaichhawn chi ni lo (Non-Communicable Diseases) lama beihpui thlakna lam a hril a. Kuminah hian September ni 15 atanga October ni 16 thleng hi sorkar laipui chuan Nutrition Month atan a puang a ni. Vawiin hunah hian School sawm bik atangin zirlai 700 chuang leh zirtirtute lo kalin , he hun hi hlawk taka hman a ni.

Dr. S. Mara Thansiami, Deputy Director, Directorate of AYUSH chuan kalkhawmte lawmna thu a sawi a. Dr.H. Malsawmtluangi, Consultant, Directorate of AYUSH chuan AYUSH System in Ei leh In Hrisel chungchang zirtirna neiin, Pi Saitluangpuii Sailo, Nutritionist, Anganwadi Training Centre  in Adressing Obesity tih thupuia hmangin kalkhawmte a zirtir bawk a. Exercise pawimawhna leh mahni a awlsam taka Exercise lak theih dan inzirtirna hun chu Dr. Shirley Lalbiakzuali Chhangte, Programme Officer, Directorate of AYUSH leh Instructor ten an hmang bawk a. Dr. Lalkhawngaihi Renthlei, Asst. Director in lawmthu sawina hun hmangin he hun hi a khar a ni.