GOVT. KOLASIB COLLEGE-IN ‘SAVE TUICHHUAHEN PROJECT’ HNUAIAH HNATLANGPUI AN KO

#ZONEWS Kolasib October 24, 2025: Vawiin khan Govt. Kolasib College zirlai leh zirtirtute chuan Kolasib khawpui tui tlan pui, Tuichhuahen vawn fai nan ‘Save Tuichhuahen Project’ hnuai-ah Hnatlangpui an ko.

He hnatlangah hian zirlai leh zirtirtu volunteer 200 chuang an thawk chhuak a. Tuichhuahen fintu luikawr, Tui lut bul lengkir atanga College veng leh Salem veng luikawr infinna thleng an thian fai a ni. Hnatlang a thawk chhuak te hian bawlhhlawh tawih thei lo chi hrang hrang, a bik takin single-use plastic, thahnem tak an chhar khawm a, an bawlhhlawh chhar khawmte hi UD&PA Department truck hmangin dumping ground-ah paih nghal a ni.

Govt. Kolasib College Principal, Pu Laltanpuia Rengsi chuan College-in project an kalpui mek chu Kolasib mipui zawng zawngte’n an thlawp a pawimawh thu a sawi a. “Bawlhhlawh luikawra kan paih mai hian kan tui tlan a ti bawlhhlawh a, tun atanga hma kan lak loh chuan reilote-ah kan tui tlan hi duh khawp lak tur awm lo khawpin a bawlhhlawh ang tih a hlauhawm hle a ni,” a ti.  Bawlhhlawh paihna hmun dik taka paih ṭheuh tur leh a tihfai kawngah pawh theih tawp chhuah zel turin a sawm nghal bawk a ni.