INDIAN ORGAN DONATION DAY 2025 LAWMNA HUN HMAN A NI – CIVIL HOSPITAL AIZAWL-AH KAL THLAK THEIH TURA HMA LAK MEK A NI

#ZONEWS Aizawl August 04, 2025: Vawiin khan State Organ & Tissue Transplant Organisation (SOTTO) Mizoram, Directorate of Hospital & Medical Education-te chuan ‘15th Indian Organ Donation Day’, DHME Auditorium-ah an hmang a, H&FW Minister Pi Lalrinpuii’n a hmanpui.

Minister Pi Lalrinpuii chuan he ni puala thupui thlan chhuah ‘Organ Donation-Life saving campaign – Nunna chhan na’na Taksa peng pek beihpui thlakna’ tih hi, Pathianin mihringte a siam ropuizia leh kan thih hnu thleng pawha theihna leh malsawmna a lo dah tamzia min hriatchhuahtirtu ni se a duh thu a sawi a; India ramah organ thlak ngai mi tam tak awmin mizote zingah ngei pawh mi eng emaw zat an awm thu leh nunna hial chan phah pawh an awm a ni a ti a. Sawrkar laipui hnuaia Transplant chungchanga thuneitu, National Organ & Tissue Transplant Organisation (NOTTO) report-a a lan danin, India ramah Kal thlak ngai bikah hian, kum 1-ah mi Nuai 2.5 bawr vel mamawhtu an awm laiin, mi 5000 bawr chauhin Kal dawn tur an nei a; Thin thlak ngai hi mi Sing 5-ah mi 1500 bawr vel chauhin a thlakna tur an hmu a; Lung thlakna tur pawh pawh kum 1-ah mi 5000-ah mi 200 aia tlemin an hmu tawk bawk a ni a ti.

Minister chuan mamawhtute hnena taksa peng pek – organ donation chu a ngaihpawimawh thu sawiin, Mizoramah pawh kalpui a nih ve theih nan health care facilities thuam chak tura hma lak mek zel a nih thu a sawi a. Sorkar laipui nen tangkawpin SOTTO Mizoram kaihhruaina hnuaiah a bul tan nan, Civil Hospital Aizawl-ah Kal thlak theih ve tura hma lak chhoh mek niin India rama Kal natna bika hmingthang em em Institute of Kidney Diseases and Research Centre, Ahmedabad-te nen MoU buaipui mek a nih thu a sawi.

Indian Organ Donation Day lawmnaah hian Dr. Lalthlengliani, Principal Director, Health & Family Welfare Department chuan Mizorama Organ Donation Life Saving Campaign kalpui a nih tan dan a sawi a. Dr. Joseph Lalhmachhuana, Nephrologist, Synod Hospital Durtlang hnen atangin Taksa peng pek – Organ Donation pawimawhna ngaihthlak a ni a; Dr. Catherine Lalmuanawmi, State Nodal Officer, NP-NCD hnen atangin Non-Communicable Disease laka inven dan ngaihthlak a nih bakah Organ petute leh dawngtute hnen atangin an tawnhriatte ngaihthlak a ni bawk a, he ni puala buatsaih Reels insiamsiaka titha Top-3 te hnenah lawmman pek an ni bawk. Dr. S.R. Ngurchamliana, Director, H&ME hovin Organ pe tura intiamna neih niin hun hi khar a ni.

SOTTO Mizoram hi Union Ministry of H&FW hnuai, National Organ Transplantation Programme (NOTP) hnuaia chak zawk leh fel fai zawka hma lak a nih theihna tura State level-a din a ni.