Larsap-in A.H & Vety. Department hotute ASF chungchang a sawipui

#ZONEWS Aizawl August 04, 2025: Vawiin khan Mizoram Larsap, General (Dr) Vijay Kumar Singh, PVSM, AVSM, YSM (Retd) chuan A.H& Vety. Department Secretary Pu Lalsangliana leh hotu dangte chu Raj Bhavan-ah kawmin, vawk pul hri African Swine Fever (ASF) chungchanga Mizoram dinhmun bakah department hmalakna leh hmachhawp tlangpuite a sawipui.

Larsap General (Dr) Vijay Kumar Singh chuan African Swine Fever-in Mizoramah kum 4 lai harsatna a thlen tawh thu sawiin, hemi avanga sum leh pai channa nasa tak thleng leh mipuite khawsak leh nunphunga nghawng nasa tak thlengte chu veiawm a tih thu a sawi a. Vawk hrileng thunun tura AH& Vety. Department hmalakna, hemi kawnga harsatna tawh leh rawtna an neihte hriat a duh avanga meeting neih a nih thu sawiin, ASF avanga harsatna thlengte khuahkhirh turin Department mal hmalakna a tawk lova, line department hrang hrangte leh mipuite nena thawhhona tha neih a ngai a ni, a ti a. Harsatna leh rawtna an thlente chu theihtawp chhuaha lo bawhzui sak a tum thu a sawi bawk.

Dr. Esther Lalzoliani, Dy. Director (DI&E) chuan PowerPoint Presentation hmangin ASF chungchang, Mizoram dinhmun leh pawimawh hrang hrangte a sawifiah a. Tarlan a nih danin March ni 21, 2021 khan Lungsen khuaah Mizorama African Swine Fever (ASF) case hmasa ber report a ni a. Nimin August ni 3, 2025 thleng khan ASF avanga vawk thi zat 69,411 awmin, hrileng darh zel tur ven nana suat (culled) 52,194 a awm a. Chhungkua 11,424 te nghawngin, cheng vaibelchhe 982.16 hu vel chan tawh anga chhut a ni a. Sawrkar laipui Assistant to State for Control of Animal Disease leh State Sawrkar kaltlangin vawk suat compensation cheng nuai 1451.915 sem chhuah tawh a ni a, heng bakah hian Mizoram DM&R Department kaltlangin vawk thi compensation cheng nuai 477.08 pek chhuah a ni tawh bawk.

Vawiin meeting-ah hian AH& Vety. Department hotute chuan Mizoram chu ASF in a chenchilh tlat tawh avangin, khuahkhirh turin hridanna (vaccination) kalpui chu hmalak theihna awm chhun a nih thu Larsap hi hrilhin, tun dinhmunah India ramah ASF vaccine a awm loh avangin a siam chhuaktu Vietnam atanga lakluh dan a awm em tih ngaihtuah a tul thu an thlen a. Sawrkar laipui atanga fund hmuh kawngah harsatna a awm avanga compensation duh anga pek theih a nih loh thu pawh an thlen bawk.

Mizoram chu Disease Diagnostic Laboratory tihchangtlunna tur, Pandemic fund project dawng tur phase 1 a state 14 thlan chhuah zing a a tel thu leh, he project hnuaiah hian NABL accreditation nei turin hmalak thuai tum a ni a. Laboratory-ah hian kumin March atang khan sample 221 test niin heng zinga 142 te chu ASF a ni tih PCR hmanga finfiah a ni. ASF avanga harsatna tawhte zirchiang turin National Institute of Veterinary Epidemiology and Disease Informatics (NIVEDI) Scientist/expert-te biak fel an nih tawh thu leh September-ah Mizoram an rawn tlawh hman beisei a nih thu tarlan a ni a. Heng bakah hian ASF chungchang inzirtirna zau zawk kalpui leh thu pawimawhte inhrilhhrlat zung zung dan turte, Line Department dangte nena tanrual dan turte, vawk thi sawngbawl dan bakah pawimawh dangte sawiho a ni.

He hunah hian Pu Ajit Roy, Secretary to Governor bakah AH & Vety. Department atangin Dr. R. Zothanmawii, Director leh Dr. PC Lalsangzuala, Jt. Director (LH) te an tel bawk.