Khawzawl District ah National Deworming Day (2nd Round) 2025 hawn a ni

#ZONEWS Khawzawl August 11, 2025: Vawiin chawhma dar 10 leh a chanve khan Presbyterian English School (PES) Vengthar Khawzawlah National Deworming Day (2nd Round) 2025 hawn a ni a, Khawzawl bawrhsap Pu K. Vanlalthiana khuallian niin, Dr Zozikpuii, Sr. Medical Officer in a kaihruai.

National Deworming Day (NDD) hi naupang kum 1 atanga 19 inkarten rulhut an pai lohna tura rulhut hlo (Albendazole) pek beihpui leh rulhutin a nghawng thalote inzirtirna atan a hman thin a ni a. Sawrkar laipui hmalaknain kum 2015 atang khan India ram pumah hman tan a ni a, kumtin a rualin rulhlut do beihpui thlakna NDD hi tumhnih hman thin niin a thawhkhatna February leh a thawhhnihna August thlaah te hman thin a ni. A thawhkhatna hi February thla khan Little Flowers School Khawzawlah hman lo ni tawhin, a thawhhnihna hi Presbyterian English School Vengthar Khawzawlah hawn a ni.

Bawrhsap, Pu K. Vanlalthiana chuan zirlai naupang te chu thlen chin apianga hmasawn a tulzia leh ngaihtuahna hman thiam tulzia te sawiin, thluak hmang tha tur chuan taksa hrisel neih a tul a, chuvang chuan vawiin programme a doctor ten tih tur leh zawm tur an sawi te hi thuawih tak a zawm tur leh midangte zirtir ve zel turin zirlai naupang kalkhawmte a fuih a, NDD hawnna hun a nei nghal a ni.

He hunah hian Dr. Shahnaz M. Zothanzami chuan zirlai naupangte hnenah NDD awmzia leh a thil tum sawifiahin rulhut pai ina hriselna a nghawng theih dan te leh rulhut laka kan him theih dan tur hrang hrangte sawifiahin thusawina hun a nei a. Pi Rochuangkimi Zadeng , Health Supervisor leh ICDS lam atangin Pu Lalrinsiama, Circle Officer te atangin thusawi ngaihthlak bawk a , Pu Laldinsanga, District Programme Manager in lawmthusawina hun a nei a ni.