Khawzawlah danin a huamloh ramngaw chungchang an sawi ho

#ZONEWS Khawzawl July 28, 2025: Vawiin chawhma dar 11 khan DC Chamber Khawzawlah danin a huamloh ramngaw (non notified tree forest areas) chungchang ngaihtuah tura din District Level Committee chu an thukhawm, Khawzawl Bawrhsap, Pu K. Vanlalthiana’n a kaihruai.

He Meeting-ah hian Supreme Court judgement order-in a phut angin Khawzawl District huam chhunga “Non notified tree forests”, State Level Expert Commitee-in kum 1997 Affidafit hmanga Supreme Court Order dated 22.2.1997-in a phut avanga a lo thehluh tawh te tuna an dinhmun zir chianna bakah, sawrkar in a la huam loh ramngaw humhalh tura rawtna awm tharte enfiah dan tur sawi ho a ni a. Hemi chungchangah hian District Level Committee member ten dan hnuaia ramngaw humhalh mek leh humhalh tura rawtna thar awmte a hmuna enfiah a, mipuite leh khawtlang hruaitute remtihna ngeia rawtnate State Expert Committee hnena thlen ni se tiin an rel. Committee member te chuan chawlhkar khat chhunga hetiang ramte a awm chuan enfel vek nise tiin a rel a ni.

Khawzawl District chhungah hian kum 1997 State Expert committee in Affidavit hmanga Supreme Court hnena a lo submit tawh ‘non-notified tree forest’ zingah heng – Zawlnghak, Bualphung ngaw, Vankal ngaw leh Ngaizawl-te an tel a ni.

He hunah hian Member Secretary, Pu Lalbiakchama Chawngthu, DFO Khawzawl WL Division bakah member dang Pu Lalfakzuala, ADC, Suvigya C. Chandra SDO (Sadar), Pu Augustine Lallungmuana P.O (DRDO) leh Pu Timothy R. Lalhmangaihzuala, SO te an tel a ni. Tin, Sub-Headquarter YMA aiawh in Pu P.C. Rosiama leh District Village Council Association aiawhin Pu C. Pazawna te an tel bawk.