H&TE MINISTER-IN MIZORAM HINDI TRAINING COLLEGE GOLDEN JUBILEE LAWMNA HUN HMANPUI

#ZONEWS Aizawl October 15, 2025: Vawiin khan Mizoram Hindi Training College (MHTC) chuan an kum 50 tlin lawmna hun, MHTC Auditorium, Durtlang North, Aizawl-ah an hmang a, Higher & Technical Education Department Minister Dr. Vanlalthlana chuan hun a hmanpui a, Hindi tawnga ziak lehkhabu 15,000 chuang awmna leh tunlai thiamna hmanga thuam, New Age Learning Centre and Fully Automated Library a hawng nghal a ni.

Minister chuan Mizoram Hindi Training College-in kum 50-na a thlen theihna tura sul lo sutute leh thawktute thawhrimnaah lawmthu a sawi a. Hindi pawimawhzia sawiin India ram zau zawk daidar tur leh eizawnna leh hna hrang hrangte thawka, ram pawna chhuak thei turin tunlai khawvelah Hindi thiam a pawimawh takzet tawh a ni a ti a. MHTC zirtirtute chu awmze nei lehzuala Hindi zirna kalpui tur te, zirlaite’n ziak leh chhiar mai ni lo, a tawng a tawng an thiam tak tak theihna turtea nasa lehzuala tan la turin fuih a. Sawrkarin tunlai khawvel thiamna sang zawk hmanga Mizo tawng leh Hindi tawng te, Mizo tawng leh Sap tawngte lehlin zung zung theihna, Artificial Intelligence, AI-Bhashini App a buatsaih mek thu sawiin, nakum kum laihawl velah chuan a hman theih tawh a beisei thu leh chungte chu zirlai ten tangkai lehzuala an hman theih nan, zirnaah senglut turin a chah bawk.

Heng bakah hian thingtlang lamah zirna tih hmasawn a ngaih nasat thu sawiin, zirtirtu indaih lohna awm thinte tihrem a nih theih nan sawrkarin hma a lak reng thu a sawi a; Aizawl khawpuia zirtirtu inbengberek nasa lutuk leh thingtlang lama zirtirtu indaih lohna nasa takte siamrem tura hmalakna kal mekah, zirtirtu thenkhat hnen atangin, mi lian leh thil tithei zawkte puna, insawn lo tura insawipui leh nawrnate a awm thin thu leh hetiang thil hi ti lo tura a duh thu a sawi a, ram leh hnam tana tha thei ang ber turin sawrkar chuan huaisen taka hma a lak zel tur thu sawiin mipuite hriatthiamna leh tawiawmna a sawm bawk a ni.

He ni lawmnaah hian Dr. Judy Lalengvari, Principal, MHTC hnen atangin College dinhmun tlangpui report ngaihthlak a ni a; Pu K. Lalhmangaihzuala, Joint Secretary, Higher & Technical Education Department pawhin thu sawiin thawktu hmasate chawimawina hun hman a ni bawk a; Dr. Lalmuanawma Sailo, Assistant Professor, MHTC chuan lawmthu sawiin he ni puala hun buatsaih hi a khar a ni.

Mizoram Hindi Training College hi Kum 1975 khan Mizoram Sawrkar leh Central Institute of Hindi, Agra te tangkawpin an din a ni a, India hmarchhaka Hindi medium-a zirtirtu trainingna hmun awmchhun niin National Council for Teachers Education (NCTE) pawmpui thlap an ni bawk.

Tun dinhmunah, MHTC-ah hian Course pathum – Hindi ShikshaParangat (B.Ed); Hindi Shikshan Praveen (D.El.Ed) leh Hindi shikshan Kaushal te kal pui mek a niin zirlai 100 vel an awm mek a ni.