Kolasib ah NH 306&06 thawmthat hna kal mek chungchangah thukhawm

#ZONEWS July 17, 2025: Vawiin tlai khan Kolasib DC Conference Room ah National Highway 306&06 thawmthat mek chak zawka hnathawh kalpui a nih theih nan Kolasib DC Pu Robert C Lalhmangaiha hovin thutkhawmna neih a ni a. He hunah hian DC, bakah Kolasib District a Addl DC, Project Director (DRDO) , Addl SP, SDO (C), NHIDCL aiawhte, Khamrang, Kawnpui VC te, KDTOA (Jt Action Comt) te leh NHIDCL contractors te an tel a ni.

Thutkhawmna kaihruaitu, Pu Robert C Lalhmangaiha, Kolasib DC chuan vawiin an thutkhawm chhan, National highway repair leh maintenance chu hun rei tawh tak atanga an buaipui tawh ni chung si a tun thlenga lirthei tan zawh hlauhawm leh lirthei hmun tamtak a tangkhang a la awm thin chu pawi a tih takzet thu sawiin, he kawngpui siam hna thawktute zawng zawng, a bik takin NHIDCL leh an contractors ten a rang thei ang bera kawngpui, lirthei ten him taka an zawh theih tur nei tura hma an lak a ngai a ni, a ti. Hemi rual hian DC chuan traffic jam nasa tak thleng thei tur laka theihtawp chhuahtu, Khamrang VC leh YMA te chungah a bik takin a lawm thu a sawi a, Police duty te chungah pawh a lawm takzet a ni, a ti a; hun local lehzel turah pawh an tha thlah lo a theihtawpa thawk chhunzawm turin a ngen nghal bawk a ni. Kawngpui siam chungchanga harsatna awm thei thil hrang hrang te ngaithla turin DC office chu a in hawng reng a ni, a ti bawk.

Vawiin hunah hian kawngpui chak zawka siam anih theihna tura hmalakna tur chi hrang hrang sawiho niin, NHIDCl leh Contractors- Balaji, BR Goyal leh Jandu te pawhin an hnathawh dan leh an harsatna tawh te report an pe bawk a ni. VC leh Truck Driver and owners Association aiawhte pawhin kawng siam chungchanga an ngaihdan te sawiin, heng hi ngun taka ngaihtuah leh sawiho a ni a. Traffic management a Police te puibawm tur leh indaihlohna phuhrukna turin Contractor ten Khamrang leh a chhehvel a mi remchang ang ang, lawmman pe a chhawr ni se tih chu an remti tlang a, lei vung paih kawngah pawh Kolasib a hmun hnih bakah khamrang leh a chhehvel a paihna tur hmun chu an VC te nen sawiho nise tih a ni bawk.

Kalkhawmte duhdan angin kawngpui siam hna thulh chuang silo a motor tlanna zuah a nih theih nan theihtawp a hmalak nise tih chu an remti tlang a, hna chak zawka a kal theih nan leh an harsatna te a hmuna enfiah turin naktuk hian DC, Addl SP leh NHIDCL aihawte leh kawnpui leh Khamrang khawtlang hruaitute leh sawmbik mi pawimawh dangte nen kawng hi enfiah(inspection) neih nise an ti . Hemi piahlamah hian NHIDCL chuan a hma thei ang bera Press Conference ko in an hnathawh dan tur leh an hmalak dan tur kimchang takin mipuite hnenah puangzar se an ti bawk.

Heng a chunga tarlan tawhte bakah hian District Level Highway Monitoring Committee, Addl DC kaihhruaina hnuaia din hnenah kawng siamtuten an work plan leh an thlen chin te thlen (report)thin nise tih a ni a, hemi rual hian kawng siam chungchanga inhnamhnawih zawng zawngte an harsatna leh an hmalak dan sawiho na turin NH monitoring whatsapp group awm mek chu hman tangkai nise an ti bawk.