Saitualah National Deworming Day 2025 thawhhnihna neih dan tur an rel

#ZONEWS Saitual, the 5th August, 2025: Vawiin khan DC Conference Room, Saitualah District Coordination Committee for National Deworming Day (NDD) chu an chairman, District Bawrhsap ni bawk Dr. Lalngura Tlau kaihhruainain an thu khawm a, National Deworming Day 2025 thawhhnihna neih dan tur rel.

He hunah hian District Bawrhsap Dr. Lalngura Tlau chuan thu a sawi a, National Deworming Day thawhkhatna chu February thla khan schoolah DEO hoin tluang taka neih a ni tawh tih a sawi a, August thla chhungin a thawhhnihna chu neih a ni leh dawn a ni, a ti.

Bawrhsap chuan faina leh hriselna kawngah naupangte kan zirtir uar a pawimawh, a ti a, hemi kawngah hian zirtirtute chuan mawhphurhna sang tak an nei a ni, a ti. Dr. Lalngura Tlau chuan rulhlut damdawi te chu kim taka naupang ten an dawn a beisei a thu a sawi a, line department te chu tang ruala theih tawp chhuah zel turin a sawm a ni.

Vawiin thutkhawmah hian Committee chuan National Deworming Day 2025 thawhhnihna hawnna chu August ni 11-ah Saitual High School-ah neih an rel a, hemi ni hian rulhlut damdawi- Albendazole Tablets chu naupangte hnenah sem a ni ang. Zirtirtute tan August ni 8 hian rulhlut damdawi thawh dan leh inpek dan tur inzirtirna ‘orientation training’ buatsaih a ni ang. National Deworming Day hian naupang leh tleirawl kum 1-19 a tin zawn a, school hrang hrangah rulhlut damdawi hi sem a ni ang a, Aganwadi centre zawng zawngah naupang kum 5 hnuai lam hnenah pek an ni dawn bawk a ni.

Vawiin thutkhawm hi District Coordination Committee for NDD Chairman Dr. Lalngura Tlau chuan a kai hruai a, Dr. Zothanpari chhakchhuak, Covener & SMO bakah District Coordination Committee for NDD member te an tel a ni.