LADC GENERAL ELECTION 2025 LO AWM TUR ATAN DRAFT ELECTORAL ROLLS TLANGZARH NIIN BLO- TE TAN TRAINING NEIH NGHAL A NI

#ZONEWS Lawngtlai August 20, 2025: Vawiin khan BDO Conference Hall- ah kan hma lawka Lai Autonomous District Council (LADC) – a ’12th General Election to Member of District Council ( MDC)’  lo awm tura Draft Electoral Rolls, ni 1, January , 2025 tehfunga hmanga duan chu  tlangzarhna neih a ni a.Pu H. Zonunmawia, Project Director, DRDO chuan ‘Draft Roll’ hi tlangzarhin, Pu Collin Hlychho, Election Officer, chuan inkhawm hi a kaihruai.

Pu H. Zonunmawia chuan Draft E/Rolls tlangzarh theih a ni chu lawmawm a tih thu tarlangin, Election Officials- te thawhrimna a fakawm hle a ti a. Inthlanna felfai leh thianghlim nei tura ‘Electoral Rolls’ dik leh thianghlim neih hmasak a tul thu sawiin, official- te leh Party lam pawh dik taka thawk turin a chah a. Project Director chuan MDC inthlan dawn apianga ‘vote transfer’  tam thin lutuk chu veiawm a tih thu tarlangin, sim a hun tawh tak zet a ni,  a ti. Claims & Objection Period-  chu hun pawimawh tak a ni tiin, hemi hunchhung hian ERO leh AERO- te fimkhur zual tura a duh thu sawiin, political party lam te pawh theihtawp a lo tawiawm turin a chah.Ram leh hnam hruaia mipuite hamthatna tura thawk tur, mi tha leh fel, mi dik tak thlanchhuah an nih theih nan dik taka hnathawh a pawimawh hle tiin,  Pu H. Zonunmawia chuan   party-  mi leh Lawngtlai District- mipuite  pawh theihtawp lo chhuahpui  turin a sawm nghal bawk.

Vawiin Draft Electoral Rolls tlangzarh inkhawmah hian Political Party aiawh an telkim vek thei a, Pu H. Zonunmawia, chuan party aiawh lo kalte hnenah ‘Draft Electoral Rolls’  copy khat theuh a hlan nghal a ni.

Vawiina Draft Electoral Rolls tlangzarh tak atanga a lan danin , LADC huamchhunga MDC inthlanpui lo awm turah hian vote nei mipa- 26,604, leh hmeichhia-27, 276 awmin, a vaiin  vote nei mi – 53,880 an  awm a. Polling Station- a Vote awm tamna ber chu 1/1 Pangkhua ( vote- 1072) niin, Polling Station- a vote tlemna ber chu 23/ 8 Hmawngbuchhuah (vote- 4) a ni.  E/ Roll- a hming thun, paih emaw samthat duh tan September ni 4, 2025 thleng hun hawn niin, Final Electoral Rolls- hi September ni 30, 2025, ah tlangzarh a ni ang.

Lai Autonomous District Council (LADC) – a ’12th General Election to Member of District Council ( MDC)’ inthlanpui tura inbuatsaihna kal zelah vawiin vêk khan BLO – te tan BDO Conference Hall- ah ‘Training’ neih nghal a ni bawk.