LAWNGTLAIAH CM SPECIAL PACKAGE GRANT HNUAIA THAWH PUI TURTE TAN ORIENTATION TRAINING BUATSAIH A NI

#ZONEWS Lawngtlai July 29, 2025: Vawiin khan Deputy Commissioner’s  Office, Lawngtlai bultumin DC Conference Hall -ah Bana Kaih Scheme hnuaia Chief Minister’s Special Package atana thlan thawhpui turte (Progress Partners) tan Orientation Training buatsaih a ni a. He hun hi Pu Cheemala Siva Gopal Reddy, IAS, Lawngtlai Bawrhsap chuan  a kaihruai.

Pu Cheemala Siva Gopal Reddy chuan Progress Partners- lo kalte hnena lawmthu  sawina a nei a. Sawrkarin mi taima leh rinawm,  hlawhtlinna chang ngei tura thawk tura a beiseite a thlanchhuah an nihna hriaa, theihtawp chhuah turin a chah a. Bawrhsap chuan Chief Minister’s Special Package hnuaia  thawhpui turte tana training buatsaih a ni thei chu lawmawm a tih thu tarlangin, he special package hnuaia hamthatna awm ang angah zirtirna tha tak an dawn turte  chu hrechianga, vawng tlat turin a sawm a. Training chuan  Progress Partners- te tan hlawkna duhawm tak a thlen ngei theih nana theihtawp chhuah tura sawmin duhsakna a hlan nghal a ni.

Dr. Saithantluangi Zote, chuan  Bana Kaih chungchang tlangpui,  a thiltum, a kalphung  leh thawhpui turte hriat tur pawimawh te zirtirna leh sawizauna a nei a. Pu Lalmuanawma Mualchin Account Officer, Lawngtlai Treasury, chuan bungrua hralh leh lei chhinchhiahna leh pawisa hman dan chhinchhiahna lehkhabu vawn dan (Basic Book Keeping) chungchangah  zirtirna a pe bawk a ni.

Chawhnu lamah hian Pu Kundan Kumar, Asst.Manager, Mizoram Rural Bank, chuan sumdawnna enkawl dan leh mahni invawn dan (Introduction to Entrepreneurship & Basic Business Management) ah  zirtirna a pe a.  Pu Lalnuntluanga Colney,   SELCO Foundation-a Senior Program Manager, chuan renewable energy hmanga sumdawnna tihhmasawn theih dan (Development of Entrepreneurship through Renewable Energy) a zirtir bawk.

Lawngtlai  District -ah hian Department – 6 nena thawkho turin Progress Partners  mi –  81 thlanchhuah an ni a, vawiina  training- te  hnenah hian Pu Cheemala Siva Gopal Reddy, Lawngtlai bawrhsap chuan ‘Certificate’ hlanna a nei   nghal a ni.