Lungleiah Bana Kaih CM’s Special Package hnuaia bana kaih turte tan orientation training buatsaih a ni

#ZONEWS Lunglei July 25, 2025: Vawiin khan Mizoram Bana Kaih (Handholding) Scheme hnuaia Chief Minister’s Special Package kal tlanga Lunglei District-a bana kaih tur (progress partner) thlan chhuah mi 362 te tan BCM Hall, Serkawnah an hma lakna tura kaihhruaina leh thil pawimawh zirtirna, orientation training buatsaih a ni a. Lunglei West bialtu MLA Pu T. Lalhlimpuia’n khuallian niin a hmanpui.

Khuallian Pu T. Lalhlimpuia chuan scheme danga ‘a hlawkna teltu — beneficiary’ tih ṭhin chu Mizoram Bana Kaih (Handholding) Scheme hnuaiah chuan ‘hmasawnna tura thawhpui — progress partner’ tih an nih thu sawiin, bana kaih turte chu hlawhtlin tuma hma la a, ṭhang zel tur an nih avangin a hming pawh ‘progress partner’ tih a nih thu a sawi a. Progress partner thlannaah chhungkhat leh party induhsakna a awm loh thu leh sawrkarin department ring ngama an kuta eng kim a dah thu sawiin, progress partner atana thlante chu hma la tak tak tur leh thawhpui tlaka ngaih, tih tur leh mawhphurhna lian tak nei an nih thu a sawi a. Bana Kaih Scheme chu hmasawnna tlo leh tluantling a awm theih nana ruahman a nih angin, ṭanpuina dawngtute chu tu leh fate thlenga chhawr theih tur leh ṭhang zel thei tura hma la turin a chah a. Hlawhtling a, a rah seng turin tuar hmasak leh thawh rim a pawimawh tih sawiin, CM’s Special Package dawngtute chu ram leh hnam tana chhenfakawma hma la tur leh an hma laknaah department-a thawktute thurawn ngaichang thiam a, hlawhtling ngei tura theih tawp chhuah turin a chah a ni.

Orientation training hi Lunglei District Agriculture Officer Pu VL Hmangaihchhunga’n a kaihruai a. District Bawrhsap Pi Navneet Mann chuan Mizoram sawrkarin Bana Kaih hnuaiah thlai thar hralhna a ngaihtuah bakah, kut hna thawh leh sumdawnnaa bul ṭan turte tan ṭanpuina sum a ruahman chu hma lakna lawmawm tak a nih thu sawiin, progress partner-te chu suma ṭanpui an nih bakah, sawrkar chuan department kal tlangin an hma lakna turah kaihruaiin, a ṭul angin a vil zui zel dawn tih a sawi a. Progress partner-te chu District tihming ṭhatu ni tura theih tawp chhuah turin a chah.

Assistant DAO Pu K. Lalrinfela chuan Mizoram Bana Kaih (Handholding) Scheme chungchang sawi fiahin, progress partner ṭhenkhat hnenah khuallian chuan certificate a hlan a. Lunglei Government College-a Associate Professor Pi Agnes L. Khawlhring chuan progress partner kal khawmte chu sumdawnna bul ṭan dan leh enkawl dan te, sum lutleh chhuak chhinchhiah fel dan te zirtirin, SELCO Foundation-a Project Manager Pu PB Lalrinfela chuan ni chakna tha leh thahrui siam thar zel theih (renewable energy) hman ṭangkai dan tur a zirtir a. Department hrang hrang hotute’n an department hnuaia progress partner-te tana hriat tur pawimawh tak tak an zirtir bawk.

Mizoram Bana Kaih Scheme CM’s Special Package hnuaiah hian Lunglei District chhungah bana kaih tur (progress partner) 362 an awm a. Commerce & Industries hnuaiah 130, Horticulture hnuaiah 78, Animal Husbandry & Veterinary hnuaiah 77, Fisheries hnuaiah 46, Agriculture & Farmers Welfare hnuaiah 14, Land Resources, Soil & Water Conservation hnuaiah 13, Tourism hnuaiah 2 leh Sericulture hnuaiah 2 an ni.

Orientation training buatsaih zawh hian progress partner-te hi certificate leh an huan/dawr-a tar tur thuziak pek nghal an ni a. Ṭanpuina sum hi a dawngtu turte bank account-ah direct benefit transfer hmangin vawiin aṭangin thun ṭan nghal a ni a. Ṭanpuina sem chhuah aṭanga thla hnih hnu aṭangin bana kaih ṭanpuina dawngtute hma lak dan chu department-a thawktute’n a hmunah kal chilha endikin, an hma lak dan leh hmasawn dan te uluk takin an vil chhunzawm dawn a ni.