Lungleiah LMC hotute leh Local Council-te’n property tax chungchang an sawi ho

#ZONEWS Lunglei October 24, 2025: Nimin khan Lunglei Convention Centre-a BoC Meeting Hall-ah Lunglei Municipal Council (LMC) Executive Councillor Pu Zorinsanga Hmar kaihhruaiin LMC hotute leh Local Council ai awhte chuan LMC-in Lunglei khawpui chhunga in leh lo chhiah, “Property Tax” a khawn mek dik tak leh felfai taka kalpui a nih theih dan tur an sawi ho va. Chhiah pek tur zat en nawn (re-assess) dan tur leh sawisel duh neite tana  complaint siam dan tur te ruahman a ni.

He ṭhut khawma tar lan a nih dan leh LMC hotute leh LC ai awhte ruahman angin, kum 2024-2025 atana LMC hnuaia Property Tax pek theih hun chhung chu November ni 15, 2025 thleng hawn a ni a. Hemi chhung hian Property Tax la pe lote’n online-in emaw, LMC office-ah offline-in emaw pe ṭheuh turin mipuite ngen an ni.

Mahni chawi tur aia tam chawi nia inhriate chuan kum 2025-2026 atan November ni 15, 2025 hmain LMC Office-ah complaint theh luh theih a ni a. Assesment lak hmaihte’n arrear-a an chawi loh nan anmahni veng Local Council-ah hriattir tura tih a ni.

Kum 2024-2025 hnu lama in sa thar/extend te chuan mahni veng Local Council-ah hriattir tur a ni a. An in leh lo (property) ngaihtuaha chhiah chawi tlem lutuk nia hriatte chu en nawn (assessment lak ṭhat) leh tum a ni bawk.