Tlabungah Project LEAP, Healthy Lunglei District Campaign leh Nasha Mukt Bharat Abhiyaan hnuaiah vohbikte tan health assessment camp buatsaih a ni

#ZONEWS Lunglei October 24, 2025: Lunglei District Bawrhsap hma laknaa Lunglei District-a vohbikte chawi kanna tur ruahmanna – Project LEAP (Lunglei’s Empowerment for Access and Equity for all Persons), taksa leh nunphung hrisel inzirtirna – Healthy Lunglei District Campaign leh ruihhlo do beihpui thlakna – Nasha Mukt Bharat Abhiyaan hma lakna hnuaiah vawiin khan Tlabunga Sub-District Hospital-ah vohbik (person with disability – PwD)-te hriselna dinhmun endikna, health assessment camp buatsaih a ni.

Civil Hospital Lunglei aṭangin Sr Speciallist (Ortho) Dr Joseph Lalrindika Chawngthu hovin Audiologist, Clinical Psychologist leh Opthalmic Assistant te bakah, Social Welfare-a thawktu te’n Tlabungah hian kal chilhin, camp pantu vohbikte hi an endik a. Tlabung Block chhunga khaw hrang hrang aṭangin vohbik mi 73 inentirin, an dinhmun endik a nih bakah, an zinga mi 70 chu Unique Disability Identity (UDID) card siamsak turin UDID portal-ah thun nghal an ni a. ALIMCO aṭanga ṭanpuina hmanraw chi hrang hrang – wheelchair, bengdar, mitdel tiang, zakdawh tiang leh hmanraw dang dilsak turte pawh chhinchhiah nghal niin, health assessment camp pantu vohbikte hi an veivahna senso tumsak an ni bawk.