NF RAILWAYS CHIEF ENGINEER-IN SAIRANG REL STATION HMALAK TAWH CHIN CHIEF MINISTER HNENAH A SAWIFIAH

#ZONEWS Aizawl August 19, 2025: Vawiin khan Pu Vinod Kumar, Chief Engineer (Construction), Northeast Frontier Railways chuan Chief Minister Pu Lalduhoma hnenah Sairang rel station sak hna an thlen tawh chin sawifiahna a nei.

Chief Engineer hian Sairang station awm dan hrang hrang chipchiar takin a tarlang a. He station-ah hian platform inkalpawh tawnna tur Subway pathum a awm dawn a. Flyover bridge a awm lo thung. Khualzin lo thleng tharte chu leihnuai platform-atanga chhukin ILP Check Post paltlang zelin an chhuak ang a. Bungraw hlanna platform lamah State Taxation hmunhma tur dahna hmun tur siam a ni bawk ang.

Chief Minister-in Union Railway Minister Pu Ashwini Vaishnaw hnena a lo thlen tawh angin, he station hi World Class station ni tura thuam that chhoh leh tur a ni.

Sairang rel station hi Prime Minister Pu Narendra Modi chuan a rawn hawng tura beisei a ni a, chumi atana inbuatsaihna lam te pawh an sawi nghal a ni.

Chief Minister hi Pu TBC Lalvenchhunga, Adviser to CM chuan a tawiawm a ni.