Minister Prof. Lalnilawma’n Ṭawizo khuaah Ṭhalfavang kût a hmanpui

#ZONEWS Saitual October 23, 2025 : Vawiin khan Ṭawizo khua Village Council leh All NGO-te buatsaihin kum 2025 Ṭhalfavang Kût hman a ni a, he hunah hian Minister Prof.Lalnilawma, Ṭawi bialtu MLA ni bawk chu khuallian niin hun a hmanpui. Minister hi Pu Lalmuanpuia Punte, MLA, Dr. Lalngura Tlau, Saitual DC, Pu John Neihlaia, CIC, Pi Betsebi Lalremruati, ACF Wildlife, Aizawl Division ten an tawiawm bawk a ni.

Khuallian Prof.Lalnilawma chuan Ṭawizo mipuite hnenah thu sawiin Ṭhalfavang kùt an hmang thei chu lawmawm a tih thu a sawi a, Ṭawizo chu Ṭawi bial hming put chhan a ni tih a sawi. Saitual District-a khaw te ber zinga mi ni mah se, an têt bik lohzia a sawi a, mi ropui tak tak an chhuak tawh a, an la chhuak zel thei a ni tiin Ṭawizo tihmingthatu ni ṭheuh turin mipuite chu a chah a ni.

Minister chuan kalkhawmte chu Ṭawizo khua aiawh palai an ni tih inhre reng turin a chah a, a tha zawnga hming thantirtu ni zel turin a fuih bawk a ni. Khuallian chuan Ṭawizo khawtlang tana sawrkar hmalakna hrang hrang te a tarlang a, theih tawp chhuah zel an tum thu a sawi bawk a ni.

Khual zahawm Saitual Bawrhsap Dr. Lalngura Tlau pawhin thu sawiin kalkhawmte chibai a bûk a, khawtlang hruaituten khaw hmasawnna atana ruahmanna an siam chu lawmawm a tih thu sawiin naupangte pawh an kalna awm kawng an kawh hmuh that chuan khawtlang tan mi tangkai an la ni dawn a ni, a ti. Bawrhsap chuan Ṭawi khuate’n ramngaw an humhalh avanga khaw 10 chuangin tui hnianghnar taka an neih theih thute sawiin midangte tan malsawmna an ni, a ti a, hlim taka hun hmang turin a duhsakna a hlan nghal a ni.

Vawiin inkhawm hi Pu H. Vanlalhluna, Chairman, Org. Committee in a kai hruai a, khuallian Minister Prof. Lalnilawma, Pu Lalmuanpuia Punte, MLA & Adviser to CM, Saitual Bawrhsap Dr. Lalngura Tlau, Pu John Neihlaia,CIC, Pi Betsebi Lalremruati, ACF Wildlife, Aizawl Division-te pawhin thu an sawi bawk a ni.