Minister Pu K. Sapdanga’n ruihhlo do chungchangah Champhai SP leh DC kawm; Champhai DUDO office a tlawh nghal

##ZONEWS Champhai December 17, 2025: Home Minister Pu K. Sapdanga chuan vawiin khan Champhaia ruihhlo do chungchangah Champhai DC Conference Hall-ah Champhai SP Pu Lokeshwaran R leh Addl. DC Pu James Lalnithanga a kawm.

He meeting-ah hian SP Pu Lokeshwaran R chuan Champhai district chhunga ruihhlo do kawnga an thil tum leh thil tih hrang hrang PowerPoint presentation hmangin a sawifiah a, ruihhlo an man zat te, ramri an vil dan te, khaw hrang hrang an endik dan te a sawiin mipui hnena inhrilhhriatna an neih hrang hrang leh ruihhlo laka fihlim tura zirtirna an neih te a sawi.

Minister Pu K. Sapdanga chuan police hnathawh chu tha a tih thu leh an taimakna fakawm a tih rhu a sawi a, ruihhlo luh tamna district a nihna angin tha taka thawk chhunzawm zel turin a chah a ni.

Minister hian DC Conference Hall a meeting a neih hnu hian District Urban & Development Office tlawhin DUDO leh Staff te a kawma an hnathawh dan leh an hmalakna hrang hrang te a enpui a, CHANEM building hmunhma a fang bawk a ni.