MLA Lt. Col. CLEMENT LALHMINGTHANGA HOVIN CHAMPHAIAH MIZO TERRITORIAL ARMY HMUNHMA TUR ENFIAH

#ZONEWS Champhai December 17, 2025: Vawiin khan Champhai South bialtu MLA Lt.Col.(Retd) Clement Lalhmingthanga hovin Champhai Mualkawi hmunhlui State Level Committee on Territorial Army Coordination and Establishment leh Mualkawi VC ten nen a hmunah kalin an enfiah a ni.

Hemi hnu hian a hmunhmate peihfel a nih hma, Mizo Territorial Army te lo awm lailawkna tur Sorkar building Tlangsam Polytechnic hmunhma leh a building thawmthat dan turte a hmunah enin Department hrang hrang ten hmalak dan tur an sawiho nghal bawk a ni.

MTA hna lak kal mek hi Mizoram sawrkar leh 166 INF BN (TA) ( Home &Hearth), Assam te nen tangkawpa buatsaih a ni a, Mizoram leilung fate tan General Duty personnel-ah 144 lak a ni dawn a, hmeichhe tan seat 9 reserved sak a ni bawk a ni.

Vawiina Mizo Territorial Army hmunhma ennaah hian Pu Lalduhthlanga, Jt Secretary Home Department, Dr Lalnuntluanga, Director Sainik Welfare & Settlement, Lian Vaphei, Company Officer, 166 INF BN (TA) leh Sawrkar Department P&E Deptt, PHED, Revenue, PWD te an tel a ni.