Minister Pu P.C. Vanlalruata’n Champhaiah District Level Awareness Programme on PMMSY, FIDF & LIFIC a hmanpui

#ZONEWS Champhai August 05 2025: Vawiin khan Thangtea Hall, Kahrawt Vengah Cooperation Minister Pu P.C. Vanlalruata chuan ni khat awh District Level Awareness Programme on PMMSY, FIDF & LIFIC, National Cooperative Development Corporation (NCDC) hnuaia Laxmanrao Inamdar National Academy for Cooperative Research (LINAC) hnuaia Regional Training Centre (RTC) huaihawt chu a hmanpui.

Minister Pu P.C. Vanlalruata chuan he hun a tel thei hi lawmawm a tih thu a sawi a, Sawrkar hian mipui hamthatna a ngaihtuah reng a, heng hamthatna te hi mipuiin an hriat a pawimawh hle thu a sawi. NCDC hi an hnathawh a tha hle a, Mizoram hian nasa zawka a hman tangkai theih nan hma lak mek a ni tih a sawi. PMMSY scheme hian sangha tam zawk thar chhuah a tum a, Ministry of Fisheries, Animal Husbandry and Dairying hnuaia scheme lian tak a ni tih sawiin sum lakluhna tha leh sangha hmanga eizawnna neite chawikanna pawimawh tak a ni tih a sawi. Cooperative hi Mizoramah tihtama thuam chak an ngaih hle thu a sawi a, cooperative society te hi khawtlang leh ram hmasawnna atan leh hnam chawikanna atan rahbi pawimawh tak a ni tih a sawi bawk. Cooperation Department hmalakna hrang hrang sawiin mipuiin an hriata an hman tangkai ngei a duh thu a sawi a, Cooperative society te an inlungrualin an thawkho tha a, dik tak leh rinawm taka thawhhona a awm theih chuan an inchawi san ngei a rin tlat thu a sawi. Sangha khawitute leh sangha hmanga eizawngtute tan inzirtirna pawimawh tak a ni a, he inzirtirna hun hlu tak hi kalkhawm te’n ngaithla thaa thil zir chhuak turin a sawm a, eizawnna changtlung tak an insiam sak theih ngei a beisei tih a sawi bawk a ni.

He hunah hian Guwahati NCDC Regional Director Pu Robert H. Touthang chuan kalkhawmte lawmna thu leh programme sawihawnna thu a sawi a, Cooperation Secretary Pu Amit Sharma leh Registrar of Cooperative Societies Pu John L.T. Sanga te chuan thu tawi sawiin Cooperation Department thiltum leh hmalakna a neih tawh te, a hmathlir te leh kalkhawmte tana a tangkai theih dan tur te an sawi. District Cooperative Officer Pu B. Lalchhanhima’n lawmthu sawiin hun khatna a khar a ni.

Training hi hun hniha then a ni a, hun khatnaah DCO Pu B. Lalchhanhima chuan Cooperative Department hnathawh leh a thil tum chungchang a zirtir a, NCDC Regional Director Pu Robert H. Touthang chuan NCDC hnathawh te, Ministry of Cooperation hmalakna te, LINAC Fisheries Business Incubation Centre (LIFIC) chungchang te a zirtir a ni. Hun hnihnaah District Fisheries Development Officer Pi Lalremsangpuii’n cooperative te tana Fisheries Department hnathawh te, Pradhan Mantri Matsya Sampadya Yojana (PMMSY) leh Fish Farmer Producer Organization (FPPO) te tana scheme hrang hrang chungchang te, Fisheries & Aquaculture Infrastructure Development Fund (FIDF) leh Pradhan Mantri Matsya Kisan Samridhi Sah-Yojana (PM-MKSSY) chungchang te a zirtir a ni.