Khawzawlah Skill Development Training Programme hawn a ni

#ZONEWS Khawzawl August 05, 2025: Vawiin chawhma dar 11 khan DC Auditorium Khawzawlah, Khawzawl DC office te leh LESDE Department te bultumin thing mistiri te leh electrician te tan Skill Development Training Programme buatsaih a ni a, Addl. Deputy Commissioner, Pu Lalfakuala’n a kaihruai.

Thing mistiri leh electrician thlan te hnenah tun kar chhung hian training neih tur a ni a, training hi Master Trainer, Pu FK. Vanlalhriata leh Pu VL. Hnehsaka ten an pe dawn a ni. Trainees te hnenah hian hnathawhna tur hmanrua chi hrang hrang pek nghal bawk an ni.

Khawzawl Bawrhsap Pu K. Vanlalthiana chuan Trainees te chu mite mit lakna tur siam chhuak thiam thei tura ngaihtuahna hmang tur te, mite duhdan chhawp chhuak thiam zel tur leh mite entawn theih tura theihthawp chhuaha taima taka thawk turin a beisei thu a sawi a. Khawzawl chhunga mi rintlak leh chhawrtlak tak ni tura in chherchhuak turin duhsakna a hlan a ni.

He hunah hian Pu Paul Rokima, SDC (G) in report pein, Pu Lalrinhlua, SDC (P) in lawmthu sawina hun a hmang a. BDO Pu Timothy R. Lalhmangaiha, Master Trainers te leh Trainees mi sawm pali te an tel bawk a ni.